ده‌وڵه‌ت و ئه‌خلاق

له‌تیف فاتیح فه‌ره‌ج
كاتێك دكتۆره‌ شه‌بنه‌م كۆردر فنجانچی به‌رپرسی ته‌به‌به‌، پرسی به‌ كار هێنانی كیمیایی له‌ لایه‌ن سوپای توركیاوه‌ ده‌وروژێنێت له‌ بری ئه‌وه‌ی حكومه‌ت شه‌رم بیگرێت كه‌ به‌رپرسی سه‌ندیكای پزیشكانی توركیا ده‌ڵێت چه‌كی قه‌ده‌غه‌ به‌ كار هاتووه‌، كه‌چی شه‌بنه‌م ڕووبه‌ڕووی سزا و لێپێچینه‌وه‌ ده‌بێته‌وه‌ ، له‌ به‌رانبه‌ردا ده‌وڵه‌ت به‌ شانازیه‌وه‌ باس له‌وه‌ ده‌كات كۆمپانیای تێرا فڕۆكه‌ی بێفڕۆكه‌وانی ده‌لی ” شێت ” ی به‌رهه‌مهێناوه‌ گوایه‌ زۆر پێشكه‌وتوه‌ ، ئێستا قسه‌ له‌ سه‌ر ئه‌وه‌یه‌ ئایه‌ بۆ ده‌وڵه‌تی ئاكاری، شه‌بنه‌م پێویسته‌، یان فڕۆكه‌ی بێفڕۆكه‌وان.
ئه‌گه‌ر توركیا پێی وابێت به‌ كیمیا بارانكردنی ئه‌شكه‌وته‌كان و شه‌هید كردنی ئازادیخوازانی په‌كه‌كه‌ ، پرسی كورد له‌ سه‌ر ئاستی ناوچه‌كه‌و له‌ ناو توركیا كۆتای دێت ئه‌وه‌ ئه‌و په‌ڕی گه‌مژه‌یی سیاسیه‌، نه‌دروستكردنی ده‌لی و نه‌گرتنی فنجانچی و نه‌ قه‌ده‌غه‌ی بینینی ئاپۆو نه‌كیمیا باران كه‌ من لام وایه‌ ئه‌مه‌ی دواییان دواتیری توركیاو ئاكه‌په‌یه‌، ناتوانن كورد له‌ ناو به‌رن، كه‌ ئێستا هیچی له‌ سێ‌ نه‌ته‌وه‌ خاوه‌ن ده‌وڵه‌ته‌كه‌ی ناوچه‌كه‌ ” تورك و فارس و عه‌ره‌ب ” كه‌متر نیه‌و له‌ ڕوی دیموكراسی و ئاكاری سیاسی و مۆراڵی پێكه‌وه‌ ژیان و توله‌ رانسه‌وه‌ زۆر له‌ پێش ئه‌وانی تره‌وه‌ یه‌ .
دانپیانانی ئه‌ردۆغان به‌ ده‌می خۆی به‌وه‌ی ئه‌و هه‌موو كورد به‌ په‌كه‌كه‌ ده‌بینێت ، وه‌ك ئه‌وه‌ی گوتی په‌كه‌كه‌ پێنج و ده‌و پازده‌ مناڵیان ده‌بێت ، جگه‌ له‌وه‌ی نیازپیسی ئه‌ردۆغان بۆ قڕكردنی كورد نیشانده‌دات ئه‌و راستیه‌شی تیایه‌ كه‌ ئه‌و و هه‌موو فاشیزمی تورك له‌ گه‌شه‌ و زیاد بوونی كورد تۆقیون، ئاخر ئه‌م قسه‌یه‌ دوای سه‌ت ساڵ له‌ هه‌وڵی قڕكردنی كورد وه‌ك شۆكوایه‌ بۆ خۆیان، ئێستا كه‌ نازانن چی بكه‌ن شه‌ڕ به‌ شاخ و داخ و سروشت و مه‌ل و ئاژه‌ڵ و په‌له‌وه‌ری چیاكان ده‌فرۆشن و به‌ كیمیا ده‌یانسوتێنن، بێئاگا له‌وه‌ی شه‌ڕ ئێستا له‌ ناو ئه‌سته‌نبوڵ و ئه‌نكه‌ره‌و له‌ ژوری نوستنه‌كه‌ی ئه‌ردۆغان خۆیدایه‌، به‌و جۆره‌ی كورد بووه‌ به‌ مۆته‌كه‌ی سه‌ری .
من دڵنیام ئه‌ردۆغان به‌ خه‌می له‌ ناوبردنی كورده‌وه‌ سه‌ر ده‌نێته‌وه‌و كوردیش هه‌ر ده‌مێنێت، له‌وه‌ش دڵنیام كه‌ ئه‌م قۆناغی به‌ كار هێنانی چه‌كی قه‌ده‌غه‌ كراوه‌ش كۆتای دێت و گه‌لی كورد سه‌رده‌كه‌وێت ، به‌ڵام شه‌رمه‌زاریه‌كی گه‌وره‌یه‌ بۆ وڵاتانی زلهێزو بانگه‌شه‌ كارانی دیموكراسی و مافی مرۆڤ كه‌ به‌ به‌ر چاویانه‌وه‌ چه‌كی قه‌ده‌غه‌ به‌ كار دێت و ئه‌وانیش له‌ به‌ر به‌رژه‌وه‌ندی نایانه‌وێت توركیا شه‌رمه‌زار بكه‌ن ، به‌ تایبه‌ت ئه‌مه‌ریكا كه‌ به‌رده‌وام چاوپۆشی له‌ كوشت و بڕو تاوانه‌كانی توركیا ده‌كات و به‌ ئاشكرا ده‌ڵێت توركیا هاوبه‌شێكی گرنگی ئێمه‌یه‌.
ئه‌م پاڵپشتیه‌ ئاشكرایه‌ی ئه‌مه‌ریكا بۆ توركیا له‌ شه‌ڕی كوردا شه‌راكه‌ته‌ له‌و بێمۆراڵیه‌ی توركیادا و هه‌ردوو ده‌وڵه‌تی توركیاو ئه‌مه‌ریكا ده‌خاته‌ یه‌ك به‌ره‌وه‌ دژی ئازادی و دیموكراتی و ئاشتی ،كێشه‌ی گه‌وره‌ له‌ پرسی كوردا ئه‌وه‌یه‌ كه‌ ئه‌مه‌ریكا مۆری تیرۆری لێداوه‌، واته‌ به‌ هه‌مان تێگه‌یشتنی توركیا مامه‌ڵه‌ له‌ گه‌ڵ كورد ده‌كات، له‌ رێگه‌ی به‌ تیرۆریست نیشاندانی په‌كه‌كه‌شه‌وه‌ ده‌یه‌وێت قڕكردنی كوردو سروشت و نیشتمانه‌كه‌ی وه‌ك كارێكی مۆراڵی به‌ پێی پێوه‌ری سته‌مكاری نمایش بكات.
له‌ راستیدا لێره‌دا پێناسه‌ی مۆراڵ لای ئێمه‌ شتێكه‌ و لای سته‌مكاری و ده‌وڵه‌تی فاشیستی توركیا شتێكی تر كه‌ ئه‌مه‌ریكا خۆی له‌ بازنه‌ی هه‌مان پێناسه‌ی توركیادا ده‌بینێته‌وه‌، ئه‌مه‌ریكا هه‌میشه‌ هه‌موو چه‌مكه‌كان به‌ چه‌مكی مافی مرۆڤ و ئازادیشه‌وه‌ به‌و جۆره‌ پێناسه‌ ده‌كات چه‌ند له‌ به‌رژه‌وه‌ندی ئه‌ودایه‌.

هەروەها چێکی بکە

حەماس  و لیكود: لێكچوونی تاوان و  بیروباوەڕ 

عەلی مەحمود  محەمەد هەرچی پارت و كەسایەتی فاشیستی جوو هەیە، لە كابینێتەكەی ئێستای لیكۆد بەسەركردایەتی …

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *