ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
ئەوەی شایەنی باس بێت، ئەوەیە کە ئەم بڕیارەی دادگای فیدڕاڵی کارەساتێک نیە کە بەسەر گەلەکەماندا هاتبێت. زیاتر لەوە، کارەساتێکە بۆ دەسەڵاتدارانی کورد، کە چیدیکە ناتوانن بە ئاشکرا ئەو دەرفەتەیان بمێنێ بۆ دزیکردن و بەهەدەردانی سامانی وەڵات لە بەرھەمی نەوت و غازدا.
وەک تەڤگەری ئازادی بۆ ڕای گشتی ڕادەگەیەنین کە ئەو بڕیارەی دادگای فیدڕاڵی عێڕاق بڕیارێکی دەستووری-یە، ئەو دەستوورەی کە لە ڕابردوودا دەسەڵاتی کوردی و بەشێک لە لایەنە سیاسیە کوردیەکان بۆ خۆیان نووسیانەوە و قبوڵیان کرد و دەنگیان بۆ دا، بەو دەستوورە ئەو بڕیارە دراوە. لە ڕابردووشدا ئێمە زۆر جار وتومانە کە ئەو دەستوورە، دەستوورێکی نادیموکراتییە و یەکێتیی و پارتیی بۆ بەرژەوەندی خۆیان دایانڕشوە و بەرژەوەندی گەلان لەبەرچاو نەگیراوە و مافە نەتەوەیی و نیشتمانیەکانی تێدا دەستەبەرنەکراوە.
یەکێکی دیکە لە هۆکارەکان کە وایکرد ئەو بڕیارە بدرێت، ئەو ڕێکەوتنە پەنجا ساڵیەیە کە نێچیرڤان بەرزانی لەگەڵ تورکیا تەنانەت بێ گەڕانەوە بۆ حکومەتیش واژووی کردووە. بەتایبەتیتریش چوونی ئەم زاتە بۆ تورکیا دووبارە بۆ مەسەلەی گرێبەستی غازی ئەوەندەی تر دادگای فیدڕاڵی جوڵاند بۆ ئەوەی بڕیارێکی ئاواهی بدات، ئەوەمان لەبیرنەچێ بۆ عێڕاق و جیهانیش غاز کەیسێکی ئێجگار هەستیارە. بەهەرحاڵ نێچیرڤان بەرزانی بە ئارەزووی خۆی، ڕۆژێک ڕێککەوتنی پەنجا ساڵەی نەوت و ڕۆژێک ئەڵێ: “غازی هەرێم هەموو تەسلیمی تورکیا ئەکەین” کە دەستەڵاتداری تورکیاش ئەمەیان نەشاردۆتەوە، کە بڵێن: بەم زووانە غازی باکووری عێڕاق دەگاتە دەستی ئێمە و سودێکی زۆری لێدەبینین و دەیگەیێنین بە هەموو ماڵێکی تورکیا”
حکومەتی هەرێمی کوردستان داهاتەکەی دیار نیە! لە ڕابردوودا بەرهەمی تەوت-غاز نەبوونەتە خێر و بەرەکەت بۆ خەڵکی ناوچەکە.
بێگومان، ئەو بڕیارە هەندێک مەترسی هەیە، بەهەرحاڵ مەترسیەکان شیاوی چارەسەرین و ئەگەر بتوانرێت لیژنەیەکی پسپۆڕو بێ لایەنی ئەکادیمی ونیشتمانی و خاوەن بڕیار و دوورلە دەستوەردانی حیزبی پێکبهێنرێت لەگەڵ دادگای فیدڕالی و بەرپرسانی عێڕاق لە دان-ستاندندابن بۆ ئەوەی ئەو کێشانە چارەسەرببن.
هۆکارێکیتر کە وایکرد ئەو بڕیارە دەربچێت، ئەو ململانێ بێ سەروبەرەیە کە یەکێتیی-پارتیی لەسەر بەدەستهێنانەوەی پۆستی سەرۆک کۆمار هەیانە و بێ شەرمانە هەموو کارتێک دژی یەکتر بەکاردەهێنن.
سەرباری هەموو ئەو کورت و کێماسیانەی لەسەرەوە باسکران،
هەرێمی کوردستان خاوەنی گەلێکی شۆڕشگێڕ و ماندوونەناس و هێژایە، خاوەنی سەروەتێکی گەورەی مرۆیی و سامانێکی سروشتی لەبن نەهاتوی نەوت و غاز و کانزاکانی ترە، ئەوەی تێیدا کەم و کورتە بەداخەوە بەڕێوەبەرایەتیەکی دیموکراتیکی ڕاستگۆیە!
دەستەڵاتی هەرێم بێ ئەوەی لەخۆیدا بەدیبکات توشی نەخۆشیەک بووە، کە هەموومان بەرەو هەڵدێرێک دەبات، کە زۆر ئەستەمە مانەوەی. دادگای فیدڕالی عێڕاق، دادگایەکی سەداسەد دیموکرتیک نیە، بەهەرحاڵ ئەوێش بەرگەی ئەو هەمووە زوڵمەی دەستەڵاتدارانی هەرێمی نەگرت و لە ئەنجامی بەتەواوی کەوتنە باوەشی دەوڵەتی تورک هاتونەتە دەنگ.
ئەوەی دەستەڵاتدارانی ئەم هەرێمە بێ گەڕانەوە بۆ گەل و دەزگاکانی، بۆ تورکیای ئەنجام ئەدەن، نیوەی ئەوە بۆ عێڕاق بکرابایە، دەکرا زۆر مافی تر لە باشووری کوردستاندا بۆ گەلەکەمان مسۆگەر بکرێت.
ئەوەی دەستەڵاتدارانی ئەم هەرێمە بەخەڵکی دەکەن، زۆر ترسناکە!
بەڕای ئێمە هێشتا دەرەچە و ڕێگای ڕزگاربوون لەو قەیرانانە هەیە، چارەسەر تەنها هاتنەوە باوەشی گەل و وازهێنانە لەبەرژەوەندیە کەسییە زەبەلاحەکانتان، گەڕانەوەتان بۆ دەستووری عێڕاق و سووڕاندنەوەی لوولەی بۆڕی نەوت بۆ لای بەغدا ئەگەر تاکە چارەسەر نەبێت ئەوا بێ گومان یەکێک لەچارەسەرە هەرە گرینگەکانە.
هەرێمی کوردستان، هەرێمێکی فیدڕاڵی ناو خاکی عێڕاقە، لە جیهانی ئەمڕۆدا، نەک هەرێمەکان حیسابی تایبەت و گەورە بۆ ناوەندەکان دەکەن، بەڵکو هەتا دەوڵەتەکانیش حیسابی ئێجگار زۆر بۆ دراوسێ بەهێزەکانیان دەکەن. هەرێمی کوردستان لەو هاوکێشە تێناگات کە جیهانێکی یەکگرتو هەیە و پێویستە حیسابی بۆبکات، نەک تەنها بۆ ناوەند و گەلانی عێڕاق..
حکومەتی هەرێم و عێڕاق، لەسەر شانیان ئەرکێکی دەستلێبەرنەدراوە کە دەبێ خۆیان بێ لایەن بکەن، چیتر نەهێڵن گەلانی ناوچەکە ببنە قوربانی ویستی وابەستەیی ئەوان، بە هێزە هەرێمی و جیهانیەکان..
تەڤگەری ئازادیی کۆمەڵگەی کوردستان
دەستەی بەڕێوەبەرایەتی
٢٠٢٢/٢/٢١
