ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
عومەر محمد
دەتوانیت مرۆڤ بیت، نەک شتێکی دی
لەبەرایدا دەستخۆشی لە ئامادەکارانی کەمپەینەکە دەکەم، رێزی ئەوانەش دەگرم کە دژن یان تێبینیان هەیەو هێشتا ئامانجەکان لاڕوون نییە.
دەبێت کەمپەینەکەش ڕونتری بکاتەوە بەدوای چ ئامانجێکەوەین، هەقە ئەوەش بزانین کە بۆ بەدەستهێنانی دوو ڕێگاهەن. یان بەگفتوگۆ لەگەڵ حکومەت بەبێدەنگی هەتا دەگەینە ئامانج، یان وەک ئێستا دەیکەین بەبابەتی میدیاو سۆشیال میدیاو خۆنواندنی خەڵکی خۆشگوزەران بۆ فیزلێدان. بێگومان ئەوەی بەیاسایی کردنی لەکن ئامانج بێت رێگای یەکەمیان دەگرێت. دەنا لەوەزیاتر ئارەقی بۆنارێژن و لەولاشەوە خەڵکانێک شەڕی ئایدۆلۆژی پێدەکەن و قوربانیەکان و بێ ناسنامەکانیش بابۆخۆیان سیربخۆن و زوڕنا لێبدەن.
منیش پشتگیری کەمپەینەکە دەکەم بێ ئەوەی شەڕی کەس بکەم، نەک هەربۆ منداڵانی باوک نادیار جەسپاندنی ناوی دایک . بەڵکو بەدوای بەدەستهێنانی ناسنامەی باری کەسێتی ئەو مرۆڤانەوەم کە ناسنامەیان نییە، نەبوونی ناسنامە واتا بوونی مرۆڤ لە دۆزەخدا، مەگەر هەر ئەو مرۆڤانە بزانن نەبوونی ناسنامە چۆن فڕێی داونەتە خوار هەژاریەوەو چۆن لەمرۆڤەوە کردونی بەکۆتەرەداری وشکهەڵاتوو.
هەربۆنمونە
دایکێک دەناسم، نەک منداڵەکانی تەنانەت خۆشی ناسنامەی نییە، چیرۆکی ئەم دایکەو منداڵەکانی هێندە تراژیدیە گەلێک شەو خەوی لەچاوان تۆراندوم و هیچم لەدەستنەهاتووە.
ئەو چیرۆکی خۆی بۆ باسکردم وتی: من دایک و باوکی خۆمم نەدیوەو نازانم کێن، گوایە لەپەلاماری ئەنفالدا جاشێک چاکەی کردووەو کە دیوێتی دایکم و باوکم لەدۆخێکی خراپدان و منیان پێ ئیدارە نەدراوە، لەوکاتەدا کە دایکم وباوکمیان بەرەوخوار بردووە جاشەکە منی هەڵگرتووەو هێناومی بۆسلێمانی لەماڵی خۆیاندا لە قلیاسان گەورەی کردوم بەڵام لەتەمەنی ١٤ ساڵیدا دامی بەپیاوێکی خەڵکی رۆژهەڵاتی کوردستان و هەر لەلای مەلا مارەی کردوم، ساڵی ١٩٩١ ڕۆیشتینەوە بۆ ئێران و لەوێش نەپەرژا گرێبەستی هاوسەرگیریم بۆبکات و کۆچی دوایی کرد، ئیتر من دیسان بێکەس مامەوەو دیسان لەگەڵ منداڵەکانم (کوڕوکچێکن) هاتینەوە بۆ ئەمدیو ئێستا نەخۆم و نەمنداڵەکانم هیچمان ناسنامەمان نییە !! منداڵەکان ئێستا گەورەبوون هەتا شەشی سەرەتاییان خوێندو لەبەر بێ ناسنامەیی نەیانتوانی چیدی بخوێنن، باشە گریمان سەرلەبەری ئەم چیرۆکە هەڵبەستراوە ئێ خۆ سێ مرۆڤ بەگۆشت وئێسقانەوە بوونیان هەیە بۆ دەبێت بێ ناسنامە بن؟ چۆن بژین و چۆن بخوێنن ؟ ئەی بەها مرۆییەکەیان ؟ ئەی بەهای ئیدارەو مافی مرۆڤ ؟ چ دەبێت ئەگەر ئەم ژنە ناسنامەی عێراقی و کوردستانی و مافی مانەوەی پێبدرێت ؟ ئەم چیرۆکە پێمان دەڵێت مەرج نیە ئەم کەمپەینە هەر بۆ ئەو منداڵانە بێت کە لەژێر جەبری داعش و لەو دۆخەدا هاتبنە دونیاوە کە ژنی تێدا لاقەکراوەو ئێستا باوکیان نادیارە. باشە واگریمان باوکیان دیاربوو ئایا ئەو منداڵانە مافی ئەوەیان نییە کە ناوی تیرۆرستێک وەک باوک قایل نەبن ؟ بۆنا
ئازیزان کۆمەڵگای دوای جەنگ مرۆڤی دەوێ بۆ بونیاتنانەوە، کورد زیاد لەجارێک پەلاماری جێنۆساید دراوەو لەدوای روخانی ڕژێمیش قۆناغی دادی راگوزەری (مرحلة العدالة الانتقالیة)ی بەخۆیەوە نەدیوە، قوربانی بەمافەکانی نەگەیشتووە، دەنا هەزاران دۆسێی تراژیدی هەن پێویستیان بەچارەسەرە، هەزاران قوربانی هەن پێویستیان بەگەڕانەوەی ماف وشکۆیە جامەرج نیە قوربانیەکان راستەوخۆبن هەندێکیان ناڕاستەوخۆن، هەربۆنمونە من کوڕی جاشێک دەناسم دەڵێت: ئەگەر بەدەست من بێت ناوی باوکم لەنفوس دەسڕمەوەو بەلابردنی ناوی باوکم ئەو پەڵەیە لەتەوێڵی خۆم دەکەمەوەو ناسنامەکەم و تەنانەت ناوی خۆشم دەگۆڕم، چونکە نەمن و نەدایکم هیچ دەسەڵاتمان نەبووە لەوەی باوکم دەبێتە جاش یان باش .دەی ئەگەر زەمینە بۆئەم مرۆڤانە برەخسێ و ناوی دایک ئاسایی بێت لەتەک ناوی باوکدا هەم لەروی سایکۆلۆژییەوە مرۆڤێک ئاسودە دەبێت هەم دەرفەتی زیاتریش بۆ ئەومنداڵانە دەرەخسێ کەلەدەرەوەی خیزان هاتوونەتە ژیانەوە نەکەونە بەرتانەوتەشەر.
ئێمە ئەگەر بەبێدەنگی و بەبێ چەلەحانێ و جنێودان و شەڕی ئایدۆلۆژی بەعەلمانی وئیسلامی و مەسیحییەوە بەڵام بەویژدان و ئەخلاوە بەردەرگای حکومەتمان گرت دەتوانین بەیاسایەک ئەم کێشەیە چارەسەر بکەین .. چونکە دەبێت وریابین نابێت ئەنجامی ئەم کارە ببێتەهۆی شکاندنی شکۆی ئینسانەکان ئەگەر شکۆیان بۆنەگێڕێتەوە نابێت ئەم هەوڵە وابکەوێتەوە هەرچی ناسنامەکەی بەناوی دایکییەوە بوو بەزۆڵ وبندیوار ناوزەدبکرێ و ببنەئامانجی مرۆڤی بێ هەست و دەماخسز.
بەبروای من یەکێک لەعەیبەکانی ئەم کەمپەینە ئەوەیە کەهێشتا نەیانتوانیوە بیکەن بەیاسا کردویانە بەژاوەژاو، فەرموون باتێبکۆشین بیکەین بەیاسا ئینجا نەک لەفەیسبوک بچۆ لەفەرمانگەی باری شارستانیش جێگۆڕکێ بەناوی باوک و دایکت بکە.
