ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
ئیدریس سدیق
ئەوەی مێژوو دەینووسی ، جیایە لەوەی سۆز دەریدەبڕی
مێژووی نوێی سەرهەڵدانی هزری وڵاتپارێزی لە ناو نەتەوەی ستەمدیدەی گەلی کورد دا ، بۆ پتر لە سێ چارەکە سەدە دەگەڕێتەوە ، مێژوویەك لە خەبات و بەرخودان ، خەرمانێك لە کاسە سەر و ئێسقان ، کۆڵە پشتێك لە فرمێسك و زام ، کوشتن و سێدارە ، راماڵین و دەربەدەری ، نسکۆ لە دوای نسکۆ ، کارەساتێك تەواو نابێ یەکێکی تاڵتر دێتە پێشەوە ، تراژیدییەکان بێ کۆتان و کوردیش لە گەڵی راهاتووە !
مێژوو نووسان ، بیرمەندان ، وڵاتپارێزان ، نووسەر و روناکبیران و ……. ، رۆژێ لە رۆژان نەیانپرسیوە ئەو هەموو نەهامەتییە لە پای چی و بۆ ؟ تاکەی لەو سەردەمی ئەو جیهانگیریەو تێکنۆلۆجیا ژمارەییە ، لە ناو ئەو زونگاوە لیخن و بۆگەن و پڕ مێش و مەگەزە تاقەت پڕووکێنە گوزەر بکا ؟
شارەزایانی بواری مێژوویی ، دنیای سیاسەت بە شەتڕەنج دەچوێنن ، سیاسییەکانیش شارەزا و یاریزان ، دەبێ خوێندنەوەیان بۆ سەرجەم جوولەکان هەبێ ، چ هەنگاوێك دەگرێتە بەر و له پشت پەردەکان چ دەگوزەرێ ، شرۆڤەی چی بۆ دەکرێ ؟ نەشارەزاکان ، هەردەم دۆڕاون و کش مەلیکیان لێدەکرێ و سیناریۆکانیان کۆتایی پێدەهێنرێ !
لەو سەردەمە نوێیە ، لە بچووکترین وڵات تا گەورەترینیان ، لە هەژارترین تا دەوڵەمەنترین و بێ رکابەرترین وڵات ، دەسەڵاتدارانیان ، خاوەن ئەزموون و ناسراو هەڵگری بڕوانامەی باشترین زانکۆن ، سەقامگیری و سەرجەم چاڵاکییەکان لە ژێر رۆشنایی سەروەری یاسادایە ، بە پێی دەستور ، ژیان وەك رۆبۆت گوزەردەکات ، ئاسایش و بەرگری نیشتیمانی هێڵی سوورە و بڤەیە ، تاکیش ناو چەقی ململانێکان و لە جوولەیە ، خاوەن بڕیاری یەکلاکەرەوەیە ، پۆلیسێك ، کە نمایندەی دەوڵەتە بڕیار بە دەستی لێپێچینەوەیە لە هەرتاکێك ، لە هەر پلەو پۆستێك بێت .
مێژوو سەڵماندوویەتی ، هەر دەسەڵاتێك بۆ ماوەیەکی درێژ لەسەر حوکم مایەوە بەبێ گۆڕانکاری ، بۆگەن دەبێت و لەو بۆگەنتر ئەو میللەتەیە کە قبوڵی ئەو دەسەڵاتە دەکات !
گەر ئەمڕۆێ هەر کۆمەڵگایەك وەك دوێنێ بوو ؛ داهاتووش هەمان ئاڕاستە و کەڵەکەبوونی قەیران و شکستەکانە ، جگە لە نوشستی ، گۆڕانکاری بەدیناکرێت . دەسەڵاتدارانی کوردی ، وەك نمایشکارانی جل و بەرگ و مۆدیل و شا جوانەکان ، روخسارێکی فەنتازی ، بەڵام تا بینا قاقایان نوقمی خۆ پەرستی ، ناخێکی پڕ لە قین ، دڕدۆنگ و خۆ بە زلزانین ، هاوتا و نموونەیان نییە لە دڕندەیی ، دنیایەك لە تاوان ، کوشتن و تیرۆر و گرێی دەروونی . شکست و نوشوستییەکان دەخەنە ئەستۆی بەرامبەر ، وەك داشی دامە ، فیگەرێکی ئیڕادە تێکشکێنراو ، بە دەستی هەواڵگری ئەم و ئەو دەجوولێنرێن ، هەردەم سوودیان لە بشێوی ، ناسەقامگیری ، شەڕ و ئاشوب وەرگرتووە بۆ درێژەدانی دەسەڵاتی تاکڕەوی ، بنەماڵەیی و پاوانخوازی لە دەرەوەی یەکڕیزی و هێزە سیاسییەکانیتر . پەرلەمان و حکومەتیش ، تەنها ناوی بێ ناوەڕۆك بەتاڵکراوەتەوە لە چەمگی دەوڵەتداری . لە مێژووی بەناو نوێی دوای راپەڕین و دەسەڵاتی خۆماڵی ، نەتونرا پێگەی جەماوەر بەهێز بکەن ، یەکڕیزی بە هەموو ئایدیا و رەنگەکانەوە پتەوبکەن ، هێزێکی بەرگری نیشتیمانی مەشقپێکراوی سەردەمیانە جێگیربکەن تا ئاسایشی نیشتمانی پارێزراو بێ و پێگەی متمانە بەهێزبێ ، تا کۆڵەگەی دەولەتداری بچەسپێ ، پەنا بردرا بۆ میلیشیا ، بۆ دەزگای هەواڵگری داگیرکەران و رایەڵەی ململانێی دەوڵەتە هەرێمییەکان ، یاریکردن بە ئاگر و کەواسوری ، بۆیەکلاکردنەوەی پاوانخوازی . ئەو کوشت و بڕیە ، دەستە سوورەکان بەو هەموو خوێنە بە ناهەقڕژاوەی تێکۆشەران ئازیدیخوازان و وڵاتپارێزان ، گەواهی زیندوون لەسەر نا نیشتیمانیبوون و خاکفرۆشی ، مۆرکێکی رەش بە تەوێڵی دەسەڵات و مێژوویەکی قێزەون و پڕاوپڕ لە شەرمەزاری کوردایەتی ……. . وێرانکردنی ژێرخانی ئابووری و ئاسایشی خۆراك ، پەروەردە ، تەندروستی ، خزمەتگوزاری ، هەلی کار و پرسی گەنجان و بێکاری و ئاڵوودەبوون بە مادە هۆشبەرەکان ، بەرتەسککردنەوەی ئازادی و زیندانیکردن ، هەڵکشانی هەڵوەشاندنەوەی هاوسەرگیری ، رووداوەکانی رێگاکانی مەرگ و ……… ، دواترینیان سوێنی خەنجەرە دەبانە ژاراوییەکە لە سەر پلە و پۆست ، نەك لەسەر ناوچە داگیرکراوەکان و پرسە نیشتیمانییەکان .
ئیتر مێژووش زمانی هەیە ، بیرمەندان ، وڵاتپارێزان و دۆستانی بیانی ، بە نووسراو ، بیستراو و بینراو هاتنە گۆ ، بە درێژایی ئەو کوردایەتییەی بە خەڵك دەفرۆشرێ ، نەتونرا ناوەڕۆکێکی پوخت و جوان نمایش بکرێ ، چ لە ناوەوە ، چ لە دەرەوە ، لە نێوەندە نێو دەوڵەتییەکان ، رای گشتی جیهان و رێکخراوەکان و ….. پیشانبدرێ ، زاراوەی یەکڕیزی ناو ماڵی کوردی ، زاراوەیەکی سواوە و بێ ئەڕزش ، قەوانێکی سواوەی تۆز لێنیشتوو ، چەمگەکەشی پاراستنی بەرژەوەندییەکانی دەسەڵاتە و سزادانی ئۆپۆزۆسیۆنە ، هەر بۆیەش فریا نەکەوتین چونکە درەنگ لە دایکبووین !
