ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
لە نۆ ھەمین ساڵەی کۆمەڵکوژیی ئێزیدییەکاندا، دەبێت نەتەوە یەکگرتوەکان و حکومەتی عێراق، رێز لە ئیرادەی ئازادی ئێزیدییەکان بگرن.
٩ ساڵ لەمەوبەر لە ٣ی ئابی ٢٠١٤، ھێزی تاریک و رەشەکوژیی داعش، بە ھاوکاریی دەوڵەتی ئەکەپە و ھاوکارە ئاشکرا و نھێنییەکانی، ھێرشی سەر شەنگال و گوند و ناوچەکانی ئێزیدییەکانیان کرد. ھێزەکانی پارتیش کە ئەرکیان پاراستنی ناوچەکە بوو، بێ ھیچ بەرگرییەک لەناوچەکە ھەڵاتن، بەم شێوەیە رەسەنتریین و دێرینتریین گەلی باوەرمەندی ئێزیدیی کە مێژوویەکە ھێرشی دەکرێتەسەرو لەناو ناچێت، بێ پاراستن جێ ھێڵدران و کەوتنە بەر شاڵاوی دڕندانە و بەھەزاران ژن و منداڵ کۆمەڵکوژکران و رفێندران و کڕیین فرۆشتنیان پێوەکرا، کۆمەڵکوژیی ٣ ئاب کە بە فرمانی ٧٤ ھەمینی سەر ئێزیدیییان ناسراوە، ھەموو دونیای ھەژاند، ئەمڕۆ دوای نۆ ساڵ لەو مەرگەساتە بێ وێنەیەدا، ھێشتا ھەر گۆڕە بەکۆمەڵەکان ھەڵ ئەدرێنەوە و تەواو نابن و ھێشتا ھەزاران کچ و ژن و منداڵ بێ سەروشوێنن؟ ھێشتا تاوانباران و ئەوانەی ئەرکی پاراستنی ناوچەکەیان لەسەرشان بوو ھیچ لێ پێچینەوەیەکیان لەگەڵ نەکراوە، بەڵکو ئەو ھێزە ھەڵاتوانە لەھەوڵی پیلانگێڕییدان، لەولاشەوە دەوڵەتی فاشستی تورک، تۆڵەی شکستی داعش لە ئێزیدییە بەرخۆدێرەکان دەکاتەوە و بەردەوام ھێرشیان دەکاتەسەر، تائێستا چەندین پێشەنگی ئێزیدیی و ھاووڵاتیی مەدەنیی شەھید و بریندار کردووە، دەسەڵاتدارانی پارتیش بەردەوام لەناو پیلانگێڕیی و شەرێکی تایبەتدان بۆ گێرانەوەی شەنگال و ئێزیدییەکان بۆ سەردەمی کۆیلایەتیی و چەوساندنەوە؟
گەلی ئێزیدیی بڕیاری خۆی داوە، ئەنجومەن و سیستمی بەڕێوەبەریی و ھێزی پاراستنی خۆی بونیاد ناوە، ئێزیدییەکان چتر سەرباز و خزمەتکاری کەس نیین، بەڵکو بۆ شەنگال و بۆ ھەرێمەکەش بوونەتە بناغەی سیستمێکی دیموکراتیی و ھێز و خۆڕاگریی لەبەرامبەر تیرۆرستان و ھێزە دەسەڵات گەراکان.
ھێشتنەوەی ئێزیدییەکان لەکەمپەکان و ھاوکاریی نەکردنی خەڵکی شەنگال و ناوچەکانی ئێزیدیی نشین و ھەوڵدان بۆ جێبەجێکردنی رێکەوتنی ٩ی تشرینی دووەم لە نێوان پارتی و حکومەتی عێراق دا، مانای بەردەوامیی دانە بەفەرمانی نوێ و کۆمەڵکوژیی بەردەوام، دەبێت ھێز و لایەنە ئازادییخوازەکان لە باشوری کوردستان و عێراق ھاوکار و پشتیوانیی بڕیاری بە جینۆساید ناساندنی کۆمەڵکوژیی سەر ئێزیدییەکان بن و رێز لە ئیرادە و بڕیاری ئەنجومەنی خۆبەڕێوەبەریی و پێشەنگانی ئێزیدیی بگرن کە بۆ ماوەی نۆساڵە خۆڕاگریی و بەرخۆدان دەکەن لەبەرامبەر تێرۆرستان و دەوڵەتی داگیرکەری تورک و داعشە دڕندەکان.
کوردستان بێ شەنگالی ئازاد نابێت
بژی بەرخۆدان و ئیرادەی ئازادی ئێزیدخان
دەستەی بەڕێوەبەرایەتیی تەڤگەری ئازادیی کۆمەڵگەی کوردستان
٢٠٢٣/٨/٢
