ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
ئەندامی دەستەی بەڕێوەبەرایەتیی تەڤگەری ئازادیی بە ماڵپەڕی تەڤگەری راگەیاند، هێرش و داگیرکارییەکانی دەوڵەتی تورکیا بۆ سەر باشوری کوردستان لەوە زیاترە کە تەنها داگیرکاریی بێت، بەڵکو سڕینەوە و لە ناوبردنی ناسنامە و جینۆساید کردنی کوردە.
ئەبوبەکر مەجید- ئەندامی دەستەی بەڕێوەبەرایەتیی تەڤگەری ئازادیی کۆمەڵگەی کوردستان بە ماڵپەڕی تەڤگەری وت: کاتێک بتەوێت زیاتر لە پرۆژە و ئەجێندای دەوڵەتی تورکیا تێبگەین، باشتروایە ئاوڕێکی کورت لە کۆماری دەوڵەتی تورکیا بدەینەوە. دامەزاندنی ئەم کۆمارە بە یەک ئاڵا، یەک نەتەوە، یەک زمان دەستیپێکرد، هەر چەندە پێکهاتەی تورکیا، پێکهاتەیەکی فرە نەتەوە و فرە پێکهاتەیە، وەکو: تورک، کورد، عەرەب، چەرکەس، لاس و ئەرمەن، بەڵام لە هەمووی مەترسییدارتر ئەوەیە کە لە دەستوور و لە ئەجێندای ئەم دەوڵەتەدا تەنیا یەک نەتەوە، یەک ئاڵا، یەک زمان هەیە ئەویش تورکە، باقیی نەتەوە و پێکهاتەکانی دیکە موعەرەزن بۆ سڕیینەوەو لەناوبردن! لەسەر ئەم بنەمایە دەوڵەتی تورکیا، پەلی هاویشتووە بۆ رۆژئاوای کوردستان، بۆ باشووری کوردستان، تەنەت لەگەڵ دەوڵەتە هاوپەیمانەکانی ڕێککەوتووە کە پشتیوانی ئەم ئەجێندا سیاسییە شۆڤێنییەی بکەن، بۆ لەناو بردنی گەلی کورد.
ئاماژەی بەوەشکرد، لە دوای ساڵی ١٩٩١ کە فرسەت هاتە پێشەوە بۆ ئەوەی کە کورد بتوانێ لە باشووری کوردستان ئیرادەیەکی ئازاد، ئیدارەیەکی دیموکراتیی بنیاتبنێت بۆ چارەسەرکردنی کێشەکانی لە باشووری کوردستان و هەروەها ببێتە پشتیوانیی بۆ پارچەکانی تری کوردستان، بەڵام بە داخەوە هەر لە سەرەتای پێکهێنانی ئەم ئیدارەیەی باشووری کوردستان، بە شێوەیەکی لاواز لە بەرامبەر سیاسەت و ئیرادەی دەرەوە خۆی کەمتر بینیوەو بەهێزێکی کەم سەیری خۆی کردوە، هەرچەندە پاراستتن و داکۆکییکردن لە مافی ڕەوای نەتەوەی کورد، وەکو کۆمەڵگە ئەرکی هەموو تاکێکە، بەڵام ئەوەی کە دەتوانێت تاکەکانی ناو کۆمەڵگە رێکبخات و بیکاتە هێزێکی گەورەتر، ئەوە بە پلەی یەک حیزبە یان پارتە کە بە ئایدیۆلۆژیایەک دەتوانێ ژمارەیەکی زۆر لە تاکەکانی کۆمەڵگە رێكبخات و کۆبکاتەوەو بیکاتە هێزێکی کۆمەڵایەتیی بە کاریگەر هەم بۆ پاراستن و هەم بۆ چارەسەر.
باسی لەوەشکرد، کە بۆچی هێز و لایەنە سیاسییەکانی هەرێمی کوردستان لەبەرامبەر داگیرکاریی تورکیا هەڵوێستیان نییەو جەختی لەوەکردەوە: بێگومان هەر لە سەرەتای دامەزراندنیانەوە ئەم هێزانە بە ئیرادەیەکی لاواز و بە پشتیوانیی دەرەوە، بە پرۆژە و پیلانی دەرەوە خۆیان رێکخستووە، دەتوانم بڵێم ئەمە خاڵی جەوهەرییە لێرەدا، بۆ نەبوونی هەڵوێستیان بەرامبەر بە داگیرکاریی تورکیا، ئەو لاوازییەیانە کە لە خودی ئەواندا هەیە، هەمیشە لە هەموو قۆرناغەکاندا هەبووە و ڕەنگی داوەتەوە.
ئەبوبەکرد مەجید، ئەوەیشی بە ماڵپەڕی تەڤگەر وت: دەوڵەتی تورکیا، بە ئاشکرا با نگەشەی لەناو بردن و داگیرکاریی دەکات، بەڵام ئەمە سەرەڕای ئەوەی کە لایەنە سیاسییەکانی هەرێمی کوردستان خۆیان ئەو ئیرادە ئازاد و بوێرییەیان نییە کە ڕووبەرووی ئەو هێزە ببنەوە، دەیانەوێ وا لە خەڵکیش بکەن کە خەڵکیش هیچ جموجۆڵێک نەکات. بێگومان ئەمە هەڵوێستێکی زۆر نێگەتیڤ و مەترسییدارە! کاتێک هێزێکی ناوخۆیی کە خاوەن ماڵبێت ئامادە نەبێت بەرگریی لە ماڵەکەی خۆی بکات، هەر کەسێکی دیکە لەدەرەوە ئەویش ئامادەبێت بەرگریی بکات، ئەو کاریگەرییەی نابێت.
لەوەش دوا: لەم قۆناغەدا، ئەوەی کە ڕۆڵی گرنگی هەیە لە پاراستن و ڕووبەڕووبوونەوەی سیاسەتی دەوڵەتی تورکیا، هێزە سیاسییەکان و ڕێکخراوەکانی باشووری کوردستان و تاک بەتاکی باشووری کوردستانە، واتە ئەگەر کۆمەڵگەی باشووری کوردوستان بێتە سەر شەقام و دەست بە تێکۆشانبکات دژی ئەو داگیرکارییە، ئەوا کاریگەری دەبێت لەسەر ڕایگشتی هەموو کوردوستان و هەموو دونیاش.
هێمای بۆ ئەوەیش کرد، بەداخەوە ئێستا هەندێ هێزی سیاسیی کە خۆیان بە دۆستێکی زۆر نزیکی دەوڵەتی تورکیا ئەزانن، وەکو پارتی دیموکراتی کوردستان و بنەماڵەی بارزانیی، بەوەش نەوەستاون دۆستایەتییان بکەن، بەڵكو ئێستا کار گەیشتووەتەوە ئەوەی دۆڵ بە دۆڵ و شاخ بە شاخ و شەقام بە شەقام، پێش سوپای تورکیا بکەوتوون، بە دڵ و بە گیان هاوکاریی ئەم پڕۆژە داگیرکاریی و جینۆسایدەی دەوڵەتی تورکیا دەکەن، جەختیکردەوە: هێرش و داگیرکارییەکانی دەوڵەتی تورکیا بۆ سەر باشوری کوردستان لەوە زیاترە کە تەنها داگیرکاریی بێت، بەڵکو سڕینەوە و لە ناوبردنی ناسنامە و جینۆساید کردنی کوردە.
ئەندامی دەستەی بەڕێوەبەرایەتیی تەڤگەری ئازادیی، بانگەواز لە هەموو تاکێک و لە هەموو ڕێخراوەکانی کۆمەڵگەی مەدەنیی و ژینگەپارێز کرد، لە هەموو شت گرنگتر ئەوەیە چۆن رووبەڕووی داگیرکاریی بووەستینەوە وتی: ئەگەر هیچ نەبێ دەتوانیت بایکۆتی شتومەک و کاڵای تورکیی بکەن، بەرچاوەڕوونیی و هۆشیاریی بدە بە بۆ خەڵک، دەوڵەتی تورکیا هیچ جیاوازییەک ناکات بۆ لە ناوبردنمان.
