ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
رێکخراوێک رایدەگەیەنێت، هەڵوێستى توندیان ئەبێت بەرامبەر ئەو رەفتارە دوژمنکارانەیەى دەسەڵات و ئیدارەى ناوچەکە کە بەرامبەر کفرى و خەڵکەکەى ئەکرێت و سامانى ژێر زەوییان دەبرێت و جەختیش ئەکەنەوە، گەر خزمەتى ئێمەتان پێ گرانە، رێگریش مەبن لەلایەن حکومەتى عێراق و پارێزگاى دیالەوە ئیدارە بدرێین.
رێکخراوى پاڵپشتی کفرى بۆ پەرەپێدان لە راگەیەنراوێکیدا ئاماژە بەوە ئەکات: لە کۆبونەوەى رۆژى 20ى ئەم مانگەى جێگرى سەرۆکى حکومەتەوە، بەتەواوى شارى کفرى پەراوێزخراوە و بە هیچ شێوەیەک باس و خواستى پڕۆژەکان و داخوازى خەڵکى ناوچەکە نەکراوە.
جەختیان لەوە کردوەتەوە، هەڵوێستى توندیان ئەبێت بەرامبەر ئەم رەفتارە دوژمنکارانەیەى دەسەڵات و ئیدارەى ناوچەکە کە بەرامبەر کفرى و خەڵکەکەى دەکرێت.
هێما بۆ ئەوەش ئەکەن خزمەتکردن و گوێگرتنى دەسەڵاتداران لە ناوچەکانى کەلار و رزگاریى بۆ گرانبەهایی زەوییەکانى ئەو ناوچەیە ئەگەڕێننەوە و وتیان: بۆچى لە کۆبونەوەکەدا نوێنەرى کفرى بەشدار نەبوە و جێگرى سەرۆکى حکومەتیش بەلایەوە گرنگ نەبووە.
رێکخراوى پاڵپشتیی کفرى بۆ پەرەپێدان راشیگەیاندوە: گەر خزمەتکردن و گوێگرتن لە داواکارییەکانمان بۆ ئێوە گرانە و ناڕەوایە و خۆتان بە خاوەنى شارەکە نازانن، ئەوا رێگریش مەبن کە کفرى لەلایەن پارێزگاى دیالە و حکومەتى ناوەندەوە ئیدارەى بدرێت و لەڕێى ئەوانەوە خزمەتى شارەکە بکرێت و سامانى ژێر زەوییەکەیشى بخرێتە خزمەتى خەڵکەوە نەک بۆ کۆمەڵێک گروپ و دەستە و حیزب بێت و خەڵکەکەیشى بەدەست کێشەوە بناڵێنن.
