تەڤگەری ئازادیی جیا لە حیزب و لایەنەکانی تر یادی شەهیدانی ٤/٢٤ی کردەوە

ئەنجومەنی هەرێمی تەڤگەری ئازادیی راپەڕیین، ئەمساڵ جیا لە حیزب و لایەنە فەرمییەکان یادی کۆمەڵکوژیی ٢٤/٤ی شاری قەڵادزێی کردەوە و تاجگوڵینەی لەسەر مەزاری شەهیدان دانا.

ئەمڕۆ دوو شەممە ٢٤/٤/٢٠٢٣، ئەنجومەنی هەرێمی تەڤگەری ئازادیی کۆمەڵگەی کوردستان-هەرێمی راپەڕیین، بۆ رێزگرتن لە ھەڵوێستی خەڵکی پشدەر لە دەرەوەی مەراسیمە حیزبیی و فەرمییەکان ساڵیادی رۆژی کۆمەڵکوژیی شاری قەڵادزێی کردەوە و

سەردانی گلکۆی شەھیدان و مۆنۆمێنتی ٢٤/٤ شەھیدانی کرد و ئیدریس عەبدوڵا ئەندامی دەستەی بەڕێوەبەریی تەڤگەری ئازادیی هەرێمی راپەڕیین بەیاننامەی تەڤگەری خوێندەوە و تیایدا هاتووە: کۆمەڵکوژیی ١٩٧٤/٤/٢٤ی شاری قەلادزێ زامێکی قوڵی لەبیر نەکراوە و پەڵەیەکی رەشی دیکەیە بەتەوێڵی دەوڵەت-نەتەوەی عێراق کە  لەلایەن رژێمی بەعسی لەناوچوو ئەنجامدرا. دەڤەری پشدەر، وەک ناوچەیەکی گرنگ و ستراتیجیی لەرووی ئاسایشی نیشتیمانیی و خۆپاراستنەوە رۆڵێکی بەرچاوی هەبووە لەپاراستن و ژیاندنی شۆڕش و شۆڕشگێڕانی کوردستان، لە ساتەمێژوویی و سەختەکاندا، خەڵکی دەڤەری  پشدەر  خاوەن فەرهەنگ و رەسەنایەتیی کوردەواریین، ئەو دەڤەرە  لەمێژووی دوورو نزیکدا هەمیشە  سەنگەری لەشکان نەهاتووی دژ بەداگیرکەران و پشتوپەنای شۆڕشگێڕانی هەرچواربەشی کوردستان بووە.

ئاماژەی بەوەشکردوە: ٤٩ ساڵ لەمەوبەر ئەوشارە رەنگین و خۆڕاگرە لە٢٤/٤/١٩٧٤ڕووبەرووی بۆمبارانێکی نامرۆڤانەی گەورەو سەخت بۆوە، لەلایەن فڕۆکە شەڕکەرەکانی رژێمی بەعسی دژ بەکورد کە بەچەکی ناپاڵم و قەدەغەکرا و ناوەندی شارەکەیان بۆمبارانکردو کۆمەڵکوژییەکی گەورەیان لەبەرامبەر دانیشتوانی خۆڕاگرو کورد پەروەری  شاری قەڵادزێ ئەنجامدا، کە بووە هۆی شەهید بوونی زیاتر لە ١٥٠ هاووڵاتیی کە نیوەیان زیاتر ژن و منداڵ و بەساڵاچووبوون.

ئەوەشخراوەتەڕوو: هەر لەو بۆمبارانەدا ٩ خوێندکاری زانکۆی سلێمانی شەهید بوون، ژمارەیەکیش لە خوێندکارو مامۆستای زانکۆی سلێمانی بریندار بوون کە لەوکاتەدا وەک پەناگەیەکی ئارام بۆبەردەوام بوون لە خوێندن  هاتبوونە ئەوشارە، قەڵادزێ و دەڤەری پشدەر لە مێژوو خەباتی بزوتنەوەی وئازادییخوازیی گەلی کورددا، هەمیشە بە ماڵی گەورە و سەنگەری نەتەوەیی  تێکۆشەران و نیشتیمانپەروەران و شۆڕشگێڕانی کوردستان ناسراوە،  هەربۆیەش دووژمنانی گەلی کورد بەردەوام ویستوویانە تۆڵەی لێبکەنەوە و ئەو هزرو هێزو ئیرادەیە بشکێنن و خەڵکە قارەمانەکەی لەشۆڕش وتێکۆشان دوربخەنەوە، بەڵام هەرچییەکیان کرد نەیان توانی ئیرادەی شۆڕشگێڕانەی خەڵکی دلێری ئەم دەڤەرە بشکێنن، لە ٢٤/٤/١٩٨٢ خەڵکی کۆڵنەدەری  قەڵادزێ پشەنگایەتی خۆپێشاندانەکانی کردو جارێکی تر ئیرادەو هێزی بۆ گەل ژیاندەوە،  لەبەرامبەردا بەعسیەکان وەک تۆڵەیەک سیاسەتی خاپورکردن و راگواستن و چۆڵکردنی دەڤەری پشدەریان لە ١٩٨٨ – ١٩٨٩  دا لە بەرامبەر ئەو دەڤەرە ئەنجامدا، بەڵام نەوەک هەرنەیان توانی ئیرادەی گەل بشکێنن، بەڵکو خەڵکی وڵاتپارێزی دەڤەری  (بتیوێن و پشدەر) لە ئازاری ساڵی ١٩٩١دا بە راپەڕینی جەماوەریی و سەرتاسەریی وەڵامی یەکلاکەرەوەیان دایەوە و کۆتاییان بە داگیرکاریی و ستەمی بەعسیەکان هێنا و لەکوردستانیان وەدەریان نان.

دەشڵێت: لەرۆژگاری ئەمڕۆدا کە یادی ئەوڕۆژە تاڵانەدەکەینەوە سەرەڕای ئەو دەسکەوتانەی بەخوێنی هەزاران شەهید بەدەستهاتوون بەهۆی ناکۆکیی و ململانێی حیزبە دەسەڵاتدارەکان و دورکەوتنەوەیان  لەبەرژەوەندییەکانی گەل دوای نزیکەی ٣٢ ساڵ لە بەڕێوەبردن و دەسەلاتدارییان نەبوونەتە وەڵام بۆ ویست وداخوازییەکانی گەل بەڵکو  ئەوەندەی تر نەھامەتیی و کێشەکانی خەڵکیان قوڵتر کردۆتەوە، داگیرکەرانی کوردستان بەردەوام  سنورەکانی ئەو ناوچەیە بۆردومان دەکەن و دەیان ھاووڵاتیی بەو ھۆیەوە شەھیدو بریندار بوون،  لەبەرامبەردا دەسەڵاتداران باشور بێدەنگ و بێهەڵویستن و ئەوەش ئەوەندەی تر خەڵکی ئەو ناوچانەی تووڕەو نیگەرانکردووە.

تیاشیدا هاتووە: لە ئێستاشدا دووژمنانی گەلی کورد بەهەمان عەقڵیەتی شۆڤێنیستیی و داگیرکاریی بەردەوامن لە کاولکاریی و کۆمەڵکوژیی لەسەر گەلەکەمان  بەتایبەت دەوڵەتی داگیرکەری تورک  لە رۆژئاواو باشور و باکوری کوردستان چەندین تاوان و کۆمەڵکوژییان لەسەر گەلی کورد ئەنجامداوە، هەربۆیە داگیرکەرانی کوردستان بەسودوەرگرتن لە ناکۆکیی هێزەسیاسییەکان و بێدەنگیی نێودەوڵەتیی تیرۆرو کاولکاریی وکۆمەڵکوژیی زیاتر لەسەر گەلی کورد ئەنجام ئەدەن، لەدوای کارەساتی ٢٤/٤/١٩٧٤ گەلی کورد رووبەرووی چەندین کۆمەڵکوژیی بۆتەوە هەر لە کیمیابارانکردنی هەڵەبجە و ئەنفالەوە تا دەگات بەکۆمەڵکوژکردن و بێسەروشوێنکردنی بەهەزاران ژن و منداڵی ئیزدی لەشانگال  لەلایەن تیرۆریستانی داعش هێرش و داگیرکردنی عەفرین و سەرێکانی وگرێسپی  و تاڵانکردن و دەربەدەرکردنی خەڵکەکەی بەبەرچاوی دنیاوە نمونەی ئەوتاوانە دژبەمرۆڤایەتییانەن کەلەسەر گەلی  کورد ئەنجام ئەدرێن، کاتی ئەوە هاتووە هەمووان پێکەوە بە دەنگی بەرز هاواربکەین بابەسبێت داگیرکاریی وکۆمەڵکوژیی بابەسبێت ناکۆکیی و دووبەرەکیی و خۆخۆریی و وابەستەبوون بە داگیرکەران، سیاسەتی دیموکراتیی و پێکەوەبوون و بەهێزکردنی یەکیەتی نەتەوەییمان تاکە رێگایە بۆپاراستنی گەلەکەمان لە شەڕوکۆمەڵکوژییەکان، ئەرکی دەسەلاتدارانی حکومەتی هەرێمە ئاوڕێک لەوشارە بێناز و خۆڕاگرە بدەنەوەو پێداویستییە خزمەتگوزارییەکانی جێبەجێبکەن و قەرەبوو زیانلێکەوتوانی بکەنەوە.

هەروەها ئەوشی وتووە: وەک تەڤگەری ئازادیی کۆمەڵگەی کوردستان، پەیمان ئەدەین بەردەوام بین لەتێکۆشان تابەدیهێنانی ئامانجە پیرۆزەکانی سەرجەم شەهیدانی رێگەی ئازادیی و سەرفرازیی کوردستان و بنیاتنانی سیستمێکی خۆبەڕێوەبەر و  دیموکرات کە گەل تێیدا خاوەن سەروەریی و ئازدیی و خۆفەرمانی بێت.

 

هەروەها چێکی بکە

ئەردۆغان نەیتوانی بە مەرامە سیاسییەکانی خۆی بگات

چرۆ شوانیی باسلەوەکات ئەنجامی بەرپەرچدانەوەیەی هاوڵاتیان بۆ سەردانەکەی ئەردۆغان بۆ عێراق، دەگەڕێتەوە بۆ داگیرکاریی دەوڵەتی …

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *