ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
ئارام قادر
ژان بۆدریار پێیوایە، لەسەردەمی پۆستمۆدێرندا (سەردەمی نمایش و شاشە و بەرخۆری) یەكێك لە جۆرەكانی لۆژیك بریتییە لە (لۆژیكی كەرامەت) كە خۆی لە هەبوونی بابەت و كاڵا و براند و ماركەی گرانبەهادا دەبینێتەوە، بۆ نمونە كاتژمێرەكەی دەستت، بۆنەكەت، قات و پێڵاو و ئۆتۆمبێل و مۆبایلەكە تا گرانبەهاتر بن ئەوا تۆ ڕێزلێگیراوتر دەبیت و زیاتر شكۆدار دەبیت، كە لە تێگەیشتنی ئەپیكۆر و فەیلەسوف و زانایان و بۆدریاریشەوە ئەمە هەرگیز بریتی نییە لە شكۆی سروشتی و وجودیانەی مرۆڤ.
كۆنفۆشیۆس دەیگوت: (مرۆڤی دانا شكۆمەندە بە بێ خۆبەزلزانی، بەڵام نەزان خۆبەزلزانە بە بێ شكۆ). كەواتە شكۆمەندی لێرەدا سەروكاری لەگەڵ مەعریفەت و عەقڵ و داناییدا هەیە نەك نمایش.
هاوكات شكۆمەندی پەیوەستە بە مرۆڤی ئازا و ئازادەوە، هەرگیز جەبان و كۆیلەكان ناتوانن شكۆمەند بن، چونكە ئیرادە و هێزە وجودیەكانی مرۆڤ و نەفسبەرزیەكەی شكۆمەندی دەكەن، كە ئەم جۆرە شكۆمەندیەی ئینسان تەنها لە كۆمەڵگە و سیستمی دیموكرات و بەداد دا دەشێ هەبێت، گەرنا بۆ پاراستنی شكۆمەندی دەبێ یاخی و تەنها و بەرەنگار بین و زۆرجاریش شۆڕشگێڕانە و سۆفیانە ژیانی شكۆمەند لە ئەشكەوتێك بكەین چاكترە. هەربۆیەشە نووسەر و شڕۆڤەكاری چەپی كەنەدی و چالاكوانی دژ بە سەرمایەداری لیبرالی (نوام كلێین Naomi Klein) دەڵێت: دیموكراسی تەنها مافی دەنگدان نییە، بەڵكو بریتییە لە ژیان بە شكۆوە. نەجیب مەحفوزی نووسەر و ڕۆمان نوسیش دەیگوت بە بێ شكۆمەندی ناتوانین بەختەوەر بین.
لە سایەی سیستم و دەسەڵاتێكدا شكۆمەندیمان هەر ڕۆژە بە جۆرێك بشكێندرێت، ئەوا بێگومان نە ئازادین، نە بەختەوەر، هیچ هێز و دەسەڵاتێك لە مێژوودا هێندەی ئەو ماوەیە كە لە ژێر سایە و سێبەری كارتۆندا دەژین سوكایەتی بە تاكی كورد نەكردووە و شكۆی نەشكاندووە!لە كاتێكدا مافی هەر كەسێكە لە كۆمەڵگەدا بە شكۆمەندییەوە بژی.
