ئۆجه‌لان، ئه‌ستێره‌ی ئازادی

ئومێد قەرەداغی

ئه‌مرۆ بیست و سێ ساڵ تێپه‌رده‌بێ به‌سه‌ر زیندانیكردنی ئۆجه‌لاندا ، گه‌وره‌یی ئۆجه‌لان ته‌نها له‌وه‌دا نییه‌ كه‌ به‌درێژایی ئه‌و ماوه‌ دوور و درێژه‌ خۆراگرییه‌كی بێ وێنه‌ی نیشاننداوه‌ ، ئه‌وه‌ش نیه‌ كه‌ سه‌ركرده‌یه‌كی گه‌وره‌ی كورد و خه‌باته‌ ئازادیخوازه‌كه‌یه‌تی ، له‌وه‌شدا كورت نابێته‌وه‌ ئه‌م پیاوه‌ بیرمه‌ندێكی گه‌وره‌یه‌، به‌ بروای من گه‌وره‌یی ئۆجه‌لان له‌ بیره‌ ئازادیخوازیه‌كانیدایه‌، له‌ تێز و روئیا و دنیابینی ئه‌ودایه‌ كه‌ هه‌ڵگری گه‌وهه‌ری ئازادیخوازی و ئاشتییە ،له‌ سه‌رده‌مێكدا كه‌ رۆژهه‌ڵاتی ناوه‌راست سیخناخ كراوه‌ به‌ بوغزی ناسیۆنالیستی و ده‌مارگیری ناسیۆنالیستی روبارێكی خوێنی رژاندوه‌ ، ئۆجه‌لان دێت و ته‌جاوزی ناسیۆنالیزمی كلاسیك و ده‌مارگیر ئه‌كات و پێشنیاری برایه‌تی گه‌لان ئه‌كات ، له‌ رۆژگارێكدا به‌ هۆی هه‌ژمووی بیری ئیسلامگه‌راییه‌وه‌ پرسی یه‌كسانی ره‌گه‌زی و گه‌راندنه‌وه‌ پێگه‌ی مێژووی ژن بۆته‌ بابه‌تێكی تابۆ كراو، ئۆجه‌لان دێت و ته‌ركیزی راسته‌قینه‌ی خۆی ئه‌خاته‌ سه‌ر ئازادی ژن ،لای ئوجه‌لان چه‌وساندنه‌وه‌ له‌سه‌ر بناغه‌ی ره‌گه‌ز خراپترین جۆری چه‌وساندنه‌وه‌یه‌ و دایكی هه‌موو جۆره‌كانه‌ ، بێ كۆتاییهێنان به‌ چه‌وسانه‌وه‌ی ره‌گه‌زی هێچ جۆرێكی دیكه‌ی چه‌وساندنه‌وه‌ كۆتایی نایه‌ت، كۆمه‌ڵگای ئازاد بێ ژنی ئازاد له‌ دایك نابێت
له‌سه‌رده‌مێكدا كه‌ هه‌ژموونی سه‌رمایه‌داری و به‌كاڵاكردن هه‌موو سووچ و قوژبنێكی ئه‌م دنیایه‌ی داگیركردوه‌ ،له‌ سه‌رده‌مێدا لێبرالیزمی ئابووری و به‌تایبه‌تكردن هه‌موو سیستمه‌ ئابوورییه‌كانی ركێفكردوه‌ ، ئۆجه‌لان ره‌خنه‌گرێكی به‌هێزی سیستمی سه‌رمایه‌داری ونادادپه‌روه‌رییه‌كانێتی له‌ دروستكردنی جیاوازییه‌ چینایه‌تیه‌كاندا ، ره‌خنه‌گرێكی تونده‌ له‌خه‌ونی سه‌رمایه‌داری بۆ گۆرینی هه‌موو شت به‌كاڵا، له‌وێشه‌وه‌ مۆدیلێكی دیكه‌ی دادپه‌روه‌رانه‌ی ئابووری پێشنیار ئه‌كات
له‌ كۆمه‌ڵگایه‌دا كه‌ كه‌مالیزم و فاشیزمی ده‌وڵه‌تی تورك نكۆڵی له‌ بوون و زمانی كورد ئه‌كات، هزری ئۆجه‌لان دروستكردنه‌وه‌ی مێژوو و بیناكردنه‌وه‌ی كه‌سێتی كورد بوو ، كه‌سێتی كوردی گۆری له‌ كه‌سێتیه‌كی ژێرده‌سته‌ و پاسیڤ و كۆیله‌كراوه‌وه‌ بۆ كه‌سێتیه‌كی ئازادیخواز و رزگاریبه‌خش ، ژنی كوردی له‌ بونه‌وه‌رێكی ترسێنراو ژێرده‌سته‌وه‌ گۆری بۆ سه‌ركرده‌ و جه‌نگاوه‌ وحاوه‌ن هێز، ،بۆ كه‌سێتیه‌ك كه‌ پره‌نسیپ و باوه‌ر بنه‌مای سه‌ره‌كی ئه‌كتیڤیستی سیاسی بن، دوای بیست و سێ ساڵ زیندانیكردن ئۆجه‌لان ئه‌ستێره‌ی دره‌وشاوه‌ی ئازادیخوازی و عه‌داله‌تی كۆمه‌ڵایه‌تیه‌، گه‌وره‌یی ئۆجه‌لان ، مرۆڤدۆستی و ئازادیخوای هزری ئه‌و ، ڤیانی خۆراگری و قوربانیدانی ، شتێكه‌ به‌ ته‌واوی مایه‌ی شانازییه‌، گیانی شانازیكردنی به‌كوردبوونه‌وه‌ لای هه‌موان بوژانده‌وه

هەروەها چێکی بکە

میدیا .. ڕای گشتی و پێگەی کۆمەڵایەتی

  ئەرسەلان بورنا  کۆتایییەکانی شەڕی دووهەمی جیهانی لە ئاکامی گۆڕانکارییەکان پێگەیەکی تایبەت و گرینگایەتییەکی زۆرتر …

وەڵامێک بنووسە

پۆستی ئەلکترۆنیکەت بڵاو ناکرێتەوە .