ماڵەکەت رەنگینە !

ئیدریس سدیق

 

یەکڕیزی یا پەرتەوازەیی ، دەبا ناوی خوای لێبێنین با ئەمجارەیان حەنانە و حەوزە تاقیبکەینەوە ! یەکڕیزی ناوماڵی کورد ، دەستەواژەیەکی سواوە و سووك ، قەوانێکی شڕ ، درۆیەکی زل ، زاراوەیەکی تۆز لێنیشتوو ……. ، پتر لە سێ چارەکە سەدەیە ، ئەسپە شەلەکە هەر نەگەیشتە شوێنی مەبەست ، شەمەندەفەرە شلۆقەکەش ، نووزەی لێبڕا و تەڕە کەڵەکەکەش هەر سەرینەگرت . داناکان و پیرتەمەنەکان وای بۆ دەچن ؛ سەد ساڵ بکەی بێگانەپەرستی ، هەر دەبینی نوشوستی و ئەوەی لەسەر سفرەی داگیرکەر دابنیشێت ، ئەستەمە متمانەی پێبکرێت ، ناسنامەی وڵاتپارێزی ڵێ دەسەنرێتەوە و بە ناپاك و خاین ناوزەد دەکرێ . مەزادخانەی خوێنی کورد ، عەیامێکە لە سەر مێزی قوماری ژوورە تاریك و پەنهانەکانی ساواك ، ئیتیلاعات ، میت و تۆڕی جالجالووکەیی هێزە هەژموونگەرا و باڵا دەستخوازە نێو نەتەوەییەکان و هێزە ناوچەییەکان سەودای لەسەر دەکرێت و ئەو دەست و ئەو دەستدەکرێ ، ئەوەندەی خوێنی گەشی کورد بە دەستی کورد رژاوە ، نیو ئەوەنددی بە دەستی داگیرکەڕران نەبوە . بەرژەوەندی هەژموونگەرایی بنەماڵەیی پشتاوپشت ، لە پشت پەردەکانەوە بەرنامەڕێژ دەکرێت ، خەنجەرە دەبانەژاراوییەکەش بۆ پشتی کورد دەسوێ ، ئازاری تڕاژیدیا ناخهەژێنەکان بێکۆتان ، زامەکان خوێنیان لێدەچۆڕێ و قەتماغەیان نەگرتووە ، لە شەڕی نەگریسی خۆکوژی شەستەکان ، ناوشاخ ، شەڕی کوردانی رۆژهەڵات ، شەڕی ناوشاری ١٩٩٦ ،، شەڕی پەکەکە و راوەدونانی وڵاتپارێزان و ئازادیخوازانی هەر چوار پارچە ، تیرۆر ، زیندانیکردن و ئەشکەنجەدان و کەواسوری بەر سوپای داگیرکەران و ……. ، مشتێکن لە خەرمانێك و ماشێنە زەبەللاحەکەی میدیاش ، بەردەوام سەرچۆپی شاییەکەی بەدەستەوەیە ، زەماوەندی یەکریزی و تەبایی ناو ماڵی کورد دەگێڕی ، دەهۆڵی پاراستنی ئاسایشی نەتەوەیی و ستراتیجییەتی بەرژەوەندی باڵای نیشتیمان دەکوتی ! ناو ماڵی کوردی ، واتە قەیران لەدوای قەیران ، غروری ، تاکڕەوی و خۆ بەزلزانین ،کێبڕکێ لەسەر بەرژەوەندییەکان ، رق و قین ، لاوازی و پەرتەوازەیی ، خۆخستنە باوەشی نەیاران و دوژمن ، ململانێکان هەڵدەکشێن بۆ ئاستی تۆڵە و یەکتر سڕینەوە ، پاشەکشەکردن لە پرسی نەتەوە و خاك ، گەندەڵی ، دوورکەوتنەوە لە بەها جوانەکانی ویژدان و بە هاوڵاتیبوون و لێبوردەیی ، شەڕە دەنووك و بازدان بەسەر یەکتر ، بێ هیوا و سەرگەردانی تاکە گەنجە داهێنەر و بە ئەزموونەکانی کۆمەڵگە لە دامێنی ژیانێکی رەش و ئاڵۆزدا و زەوتکردنی ئازادییەکان و ……… . بە درێژایی مێژوو داگیرکەرانی کوردستان ، دەستێکیان قورئان و دەستێکیان شمشێر بوە بۆسەر گەردەنی کورد و سەرکوتکردنی ، پاش سەدان ساڵ لە هەژموونی سێگۆشەی مەرگی دەسەڵاتی نەژادپەرست و خوێناوی سوننە ، لە ئەنفال و جینۆسایدکردن ، بە عەرەبکردن ، راگواستن ، سێدارە و زیندانیکردن و ….. کورد لە سەر کەوڵەکەی بوە قۆچی قوربانی ، عێراقی حەبیبیان نوقمی گۆمی خوێن کرد و دروشمی ( أين الرفاق أين حمام الأيكة — لطخوها بدم قان فاسودتي ) یان پیادەکرد و بە هەزاران هاوڕێیانی حیزبی شیوعی و ئازادیخوازان و وڵاتپارێز هەبوو ، هۆڤانە و دڕندانە لەناوبران و لە رەگەوە هەڵیان تەکاند و یەکپارچەیی عێراقیش هێلی سور بوو . لە ٢٠٠٣ وە ، ئەستێرە گەشاوەکەی سوننییەکان ئاوابوو ، خومەینییەکانی حەوزەی نەجەف باڵا دەستبوون ، فرمایشتەکەی ئیمام لە ( قوم ) وە بەرزبۆوە لەسەر پاراستنی یەکپارچەیی عێراق و بە هێلی سور کردنی ، وەك سوننییەکان راهاتوون لەسەر هەژموونی بیر تەسکی و نەژاد پەرستی ، ئەوەندەی ئاخوندەکانی قوم بە تەنگ پرسی کوردی رۆژهەڵاتبوون لە نکوڵیکردن و سڕینەوە ، هەر ئەوەندەش لە مێزەرە رەشەکانی حەنانە و حەوزەی نەجەف چاوەڕواندەکرێ . خۆ کۆنگرەکانی ئۆپۆزۆسیۆنی عێراقیش ( ڤیەننا -حوزەیرانی ١٩٩٢ ، پیرمام – تشرینی دووەم ١٩٩٢ ، نیویۆڕك – ئادار ١٩٩٩ ، لەندەن – کانونی یەکەم ٢٠٠٢ ) بەڵگە نەویستن لەسەر دواخستنی دۆسێی کورد بۆ دوای رووخانی دەسەڵاتی بەعس ، وەك مێوانێکی رەزا قوڕس سەیر دەکرێ ، هەڕەشەیە لە سەر یەکپارچەیی خاکی عێراق و عێراق بنکۆڵکەن و کەشکیش برای دۆیە . لە کاتێکا کێبڕکێکان لە ناو ماڵە ، کورد ناتوانێ ناو ماڵی خۆی رێکبخا ، ئەوەندەی پەرۆشی یەکڕیزی ناو ماڵی سوننە و شیعەن ( کە بەهێز بوونی عێراقە ) ، لەسەر راسپاردە و رێنمایی هێزی دەرەکی هاوپەیمانێتی دەکەن ، تاکلایەنە دەچەمێنەوە ، کڕنۆش دەبەن ، شان ماچ دەکەن ، دەست بە مەزاری ئیمام موسای کازم دەگرن ، وەك لە رۆژی عاشورا خۆیان شل و کوتدەکەن ، بەڵکو خوا بیکات دڵیان نەرمبێ و پۆستێکی چەور و بەفەڕیان بە نسیببێ و نەیارەکەیان لاواز و بەر نەفرەتە کەوێ ، لە سەر پۆستێك یەکتر کەوڵدەکەن و یاری بە چارەنووسی گەلێك دەکەن ، خۆ جاشێکی عەیار بیست و چواریش بێت ، متمانەی پێناکەن . دەبێ ئەو راستییە بزانرێ ، هەرچەندە شیعە و سوننە بەرژەوەندی جیاواز و تایبەتیان هەیە و دژ بە یەك و یەکانگیر نین ، بەڵام لە ئاست ستراتیج و هەڕەشەی چارەنووسساز دا کۆکن و بڕیارەکانیان تەواوکەری یەکتر و یەکلاکەرەوەن ، بە سیستیماتیك کار لە سەر شکستهێنانی یەکڕیزی ناو ماڵی کورد دەکەن . لەگەڵ ئەوەشدا ، بە ئاشکرا و بەبێ هیچ پەنا و شەرمێك ، ئەجیندای داگیکەران جێبەجێدەکرێت ، کورد باجێکی زۆری هەڵە مێژووییەکانی داوە ، ئەمجارەیان لەگەڵ مارێکی دوو سەرە یاریدەکا ، بە لاوازی چووەتە نێو یارییەکە . پرسی کورد ، پرسی خاکە ، مافە نەتەوەیی و نیشتیمانێکە ، لە گۆشە نیگای بەرژەوەندی باڵای نیشتیمانی ، تاکە بژاردەی سەرکەوتوو تەنها بە پاکێجی نەتەوەیی بەهێزەوە و بە یەکڕیزی ، تێگەیشتنی موماڕەسەی دیموکڕاسیانەی هاوبەشی سەرجەم حیزب و لایەنەکان و شەقام ، گیانی بە یەکەوە کارکردن و کارا کردنی هاوبەش لە بڕیاردانە ، دۆخی سیاسی هەرێم بەرگەی زیاتری گرژبوون و نا سەقامگیری ناگریت و مەترسی سەرهەڵدانی توند و تیژی و لێکترازانێکی هەڕەشە ئامێز چاوەڕێی هەموو کوردی باشوور دەکات . ئەگەر بایە ، ئەگەر بارانە بۆ بەفر هەر زیانە.

 

 

هەروەها چێکی بکە

ژن، ژیان، ئازادی Woman, Life, Freedom

کەمال چۆمانی – ژن، ژیان، ئازادی -زن، زندگی، ازادی- دروشمی سەرەکیی خۆپیشاندانەکانی کۆی شارەکانی کوردستانی …

وەڵامێک بنووسە

پۆستی ئەلکترۆنیکەت بڵاو ناکرێتەوە .