ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
هاوسەرۆکی پادێ حسێن حەجی رایدەگەیەنێت، پاتی دیموکراتی کورستانی عێراق ئاوارەکانی ناو کەمپەکانی هەرێمی کوردستان وەک قەڵغان بەکاردەهێنێت و وتی، “پارتی ئاوارەکان وەک ئامرازێکی بانگەشەی هەڵبژاردن بەکاردەهێنێت.”
هاوسەرۆکی پارتی ئازادیی و دیموکراسی ئێزدییەکان (پادێ) حسێن حەجی ئاماژە بە هەڵبژاردنەکان و هێرشە داگیرکەرییەکان دەوڵەتی تورک بۆ سەر باکوور و رۆژهەڵاتی سوریا دەکات و رایگەیاند: “ئێمە وەک دەستەی هەماهەنگی حزب و هێزەکانی شەنگال بەردەوامین لە کارەکانمان و رۆژ لە دوای رۆژ هاوپەیمانێتیەکەمان پتەوتر و بەهێزتر دەکەن. رۆژانە بە گەلەکامن دەڵێین هەڵبژاردن بەڕێوەیە و نابێت گەلەکەمان بخەڵەتێندرێن. دەبێت وەک هەموو جارێک گەلەکەمان خۆی چارەنووسی خۆی دیاری بکات و نوێنەرانی خۆی دەستنیشان بکات. هەرچییەک دەبێت با ببێت ئێمە خاوەنداری لە هاوپەیمانی خۆمان دەکەین و کۆمەڵگاکەمان دەگەیەنینە ئارامیی و سەقامگیریی، بەر لە هەموو شتێک دەمانەوێت کێشەی شەنگال لە رووی سیاسییەوە چارەسەر بکرێت”.
حەجی باسی لە داگیرکەرییەکانی دەوڵەتی تورک بۆ سەر باکوور و رۆژهەڵاتی سوریا کرد و ئەوەی لەو هێرشانەدا ناوچەکانی نیشتەجێبوونی مەدەنییەکان و ژێرخانی خزمەتگوزاری بۆردومان دەکرێن، بێدەنگی رای جیهانیی بەرامبەر بەو هێرشە دڕندانە و نامرۆڤانەیەی سەرکۆنەکرد و وتی، بەرامبەر بە هێرشەکانی سەر غەززە هەموان دەنگ هەڵدەبڕن و دژی دەوەستنەوە بەڵام بەرامبەر بە هێرشەکانی سەر دەوڵەتی تورک بۆ سەر رۆژئاوا و کوشتنی خەڵکی مەدەنی لەلایەن ئەو دەوڵەتەوە کە چەندین ساڵە بەردەوامە، بێدەنگن و ئەوەشی بە دووڕووی ناوبرد.
هاوسەرۆکی پادێ سەردانی ژمارەیەک کەس و بەرپرسی لایەنە عێراقییەکانی بۆ تورکیا و کۆبوونەوە لەگەڵ تەیب ئەردۆغان سەرۆککۆماری تورک بە بیرهێنایەوە و وتی، ئەو شاند و کەسانەی لەگەڵ ئەردۆغان دادەنیشن تەنیا بۆ بەرژەوەندی خۆیانە و هیچ کاریگەرییەک لەسەر گەلانی عێراق دانانێت و جەختیشی کردەوە کە متمانەیان بەو کەسانە نییە. هەروەک راشیگەیاند، تائێستا هیچ کەس و لایەنێک بەرامبەر بە بوونی بارەگا سەربازییەکانی سوپای تورک و بەردەوامی هێرش و بۆردومانەکانی ئەو دەوڵەتە بۆ سەر ناوچە جیاجیاکانی عێراق دەنگی هەڵنەبریوە و ناڕەزایەتی خۆی بە بەرپرسانی دەوڵەتی تورک نەگەیاندووە.
حەجی ئاماژەی بە رێککەوتنی ٩ی تشرین کرد و بەم جۆرە درێژەی بە قسەکانیدا: “لە دوای واژۆکردنی ئەو رێککەوتنە خەڵکی نەینەوا و بە تایبەتیش کۆمەڵگەی ئێزدی دژی وەستانەوە. گەلی ناوچەکە لەو بڕوایەدان کە نابێت هیچ هێز و لایەنێک هەبوونی خۆیان بەسەر گەلەکەماندا بسەپێنێت. کاتێک لە رووی جوگرافییەوە راوەستە لەسەر بابەتەکە بکەین شەنگال سەر بە موسڵە و موسڵیش سەر بە بەغدایە. هیچ پێویست نییە لە رێگەی باشووری کوردستانەوە داواکارییەکانمان بگەیەنینە بەغدا. ئێمە خۆمان داواکارییەکانمان و مافەکانمان ئاراستەی بەغدا و لایەنە پەیوەندیدارەکان دەکەین”.
حەجی ئەوەی خستەڕوو کە رێککەوتن و بڕیارەکانی سەردەمی کازمی هەڵوەشاونەتەوە و راشیگەیاند: “ماوەی چوار ساڵ کازمی سەرۆکوەزیرانی عێراق بوو. کازمی لەوماوەدا زۆر رێککەوتنی لەگەڵ لایەنە جیاجیاکان واژۆکرد، بەڵام دواتر حکومەتی ئێستا هەموو بڕیار و رێککەوتنەکانی سەردەمی کازمی بەفەرمی هەڵوەشاندەوە، بەڵام تائێستا رێککەوتنی ٩ی تشرینی یەکەم هەڵنەوەشێندراوەتەوە. ئێمە دەزانین کە ئەوە جێبەجێ ناکرێت. نە گەلی نەینەوا و نە کۆمەڵگەی ئێزدی ناچنە ژێرباری ئەو رێککەوتنە و قەبوڵی ناکەن”.
حەجی باسی لەوەکرد، زۆرێک لە دەسەڵاتدارانی باشوور و عێراق ڕێککەوتنەکە بە گەڕانەوەی کۆچبەران دەبەستنەوە، بەڵام ئەم لێدوانانە هیچ ڕاستی و بنەمایەکی نییە. حەجی ئاماژه ی بەوەدا که عێراق و باشوور دەیانەوێت پرسی کۆچبەڕان بکەنه پرسێکی سیاسی و وتی: “پەدەکە کۆچبەڕانی نێو کەمپەکانی باشوور وەک قەڵغان به کارده هێنێت”. بەقازانجی خۆیان بانگەشەی هەڵبژاردنیان پێوە دەکەن. زۆر جار وەزارەتی کۆچبەرانی عێراق لێدوانی داوە و دەڵێت “بەم زووانە هەموو کەمپەکانی باشوور دابخەن و کۆچبەرەکان بگەڕێننەوە سەر خاکی خۆیان”. ئەم بڕیارە لە هەموو ناوچەکانی عێراق جێبەجێ کراوە، بەڵام تەنیا لەکەمپەکانی باشوور وەک خۆی ماوە و پەدەکە وەک قەڵغان بەکاریان دەهێنێت”.
هاوسەرۆکی پادێ حسێن حەجی وتیشی، کە دەستەی هەماهەنگی هێز و پێکهاتەکانی شەنگال ماوەیەک لەمەوبەر لەلایەن ئەڵمانیا و نەرویژەوە بانگهێشت کراون و بەم قسانە کۆتایی بە وتارەکەی هێنا: “ئێمەش بە ناوی کۆمەڵگاکەمانەوە سەردانی ئەو وڵاتانەمان کرد”. داواکاری کۆمەڵگاکەمان پێشکەش بە هەردوو وڵات کرد. ئەوان زۆر دڵخۆش بوون بە سەردانەکەمان، چونکە شتی پێچەوانە گەیشتووەتە دەستیان. تا کۆتایی کار بۆ بەرژەوەندی کۆمەڵگاکەمان دەکەین وبۆ کۆمەڵگاکەمان دەبینە پرد. دەستەی هەماهەنگی هێز و پێکهاتەکانی شەنگال بووەتە هیوای کۆمەڵگا”.
