ئەگەر رووباری سیروان ووشک بکات چی روودەدات؟

ئەندازیارێک لە بەڕێوەبەرایەتی بەنداوی دەربەندیخان لە تۆڕە کۆمەڵایەتییەکان بڵاوی کردەوە، لەکاتی وشکبوونی ئاوی رووباری سیروان ژینگەی روبارەکە پیسدەبێت و کاریگەری لە سەر سامانی ماسی و سەدان باڵندە دەبێت و لە پارێزگای هەڵەبجە و قەزای سەید سادق ٢٥٠هەزار هاوڵاتی لە مانگێکدا بێ ئاودەبن و لە خواروی دەربەندیخانیش زیان بە کشتوکاڵی زیاتر لە یەک ملیۆن هاوڵاتی دەگات

ئەندازیار حسێن ساڵح لە بەنداوی دەربەندیخان رایگەیاند، بە گوێرەی بەدواداچونی تیمی ھایدرۆلۆجی بەنداوی دەربەندیخان لەسەرەتای مانگی ئایارەوە ئێران یەک دڵۆپ ئاوی بەرنەداوەتەوە ئەوەشی ھەیە تەنھا ھی کانیاو و چەمەکانی گریانەو ھاوارو ھەندێ گوندی تری ھەرێمی کوردستانە.

هاوکات، ئاماژە بە لێکەوتەکانی وشک بونی سیروان دەکات و دەڵێت، لە ئەنجامی وشکبوونی رووبارەکە:

یەکەم: پیسبونی ژینگەی ئاویی روبارەکە و کاریگەری لەسەر سامانی ماسی و سەدان جۆر باڵندە

دووەم: کاریگەری ڕاسەوخۆی لەسەر پرۆژەی ئاوی پارێزگای ھەڵەبجەو قەزای سەیدسادق کە ئەگەر بەم شێوەیە بەردەوام بێت ئەوا کەمتر لە مانگێک ٢٥٠ ھەزار کەس بێ ئاو دەبن.

سێیەم: کەمبونەوەی داھاتی ئاو لە بەنداوی دەربەندیخان و دابەزینی ئاستی ئاوی دەریاچەکە چونکە رووباری سیروان نزیکەی لە ٧٠٪‏ داھاتی بەنداوەکە پێک دەھێنێت.

چوارەم: پیسبونی ئاوی دەریاچەکە چونکە ئەو ئاوەی ئێستا لە رووباری تانجەرۆوە دەڕژێتە دەریاچەکە  نزیکەی سێ ھێندەی رووباری سیروان و زمکانە و لەبەرئەوەی تانجەرۆ پاشماوەی ئاوەڕۆی سلێمانی و سەدان کارگەیە بەبێ فلتەرەیشن.

پێنجەم: کەم بونەوەی ئاوی خواردنەوەو کشتوکاڵ لەسەر زیاتر لە  یەک ملیۆن لە دانیشتوانی خواروی بەنداوی دەربەندیخان.

ئەندازیار حسێن ساڵح داوا لە دڵسۆزان و خەمخۆران و رێکخراوەکانی ژینگەو ئاو کە لەھەموو ئاستەکاندا لە ھەرێمی کوردستان و عێراق بکەونە جوڵە بۆ گفتوگۆکردن و قەناعەت پێھێنانی ئێران بە بەردانەوەی بەشە ئاوی عێراق بەپێی یاسا نێودەوڵەتیەکانی تایبەت بەئاو چونکە روبارێکی سنور بڕە.

رووباری سیروان یەکێکە لە رووبارە گرنگەکانی کوردستان و سەرچاوەکەی لە رۆژهەڵاتی کوردستانە و بە سنوری پارێزگای هەڵەبجەی شەهیدا تێپەڕدەبێت و دەڕژێتە رووباری دەربەندیخانەوە. سەرچاوەیەکی گرنگی دابینکردنی ئاوی خواردنەوە و کشتوکاڵییە.

هەروەها چێکی بکە

لە ڕانیە دژی هێرشەکانی تورکیا گردبوونەوەیەک بەڕێوەچوو

ئەو هاوڵاتیەی لە بۆردومانی فڕۆکە بێ فڕۆکەوانەکانی دەوڵەتی تورک ئۆتۆمبێلەکەیان کرایە ئامانج لە ڕونکردنەوەیەکدا بە …

وەڵامێک بنووسە

پۆستی ئەلکترۆنیکەت بڵاو ناکرێتەوە .