ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
نوێنەری بەشیک لە هێزی سیاسی و ڕێکخراوەکانی کۆمەڵگەی مەدەنی و کەسایەتی دیار و نوسەر و ڕۆژنامەنوس ئامادەکاری دەکەن بۆ پێکهێنانی بەرەیەکی فراوانی نیشتمانی و بەرەکەش بەناوی سەکۆی کاری نیشتمانیەوە دەبێت.
دوێنێ لە شاری سلێمانی کۆبونەوەیەکی تایبەت بە ئامادەکاریەکانی پێکهێنانی سەکۆیەک بە ناوی سەکۆی کاری نیشتمانی بەڕێوەچو، کە ماوەیەکە کار بۆپێکهێنانی دەکرێت و ئەمەش وەک یەکەم هەنگاوی کردەیی بۆ ئامادەکاریەکان هەژمار دەکرێت.
بەپێێ سەرچاوەکان سەکۆکە لیژنەیەکی کاتیی ئامادەکار پێکهاتوە بە مەبەستی پەیوەندیکردن بە لایەن و کەسایەتی و ڕێکخراوەکانی تر و رێکخستنی کارەکانی ئامادەکاریەکە بۆ هەنگاوەکانی داهاتوو تر.
نەبەز خالید یەکێک لە ئەندامانی دەستەی ئامادەکار و وتەبێژی کاتیی دەستەکە بە ڕاگەیاندنەکانی ڕاگەیاندووە” ژمارەیەک لە هێزە سیاسیەکان و ڕێکخراوەکانی کۆمەڵگەی مەدەنی و کەسایەتی سیاسی و ڕۆشنبیران و ڕۆژنامەنوسان و چالاکانی مەدەنی لە دەستەی ئامادەکاریەکەن و لە هەوڵی فراوانکرانی بەرەکەدان و دەرگایان کراوەیە بۆ هەر هێز و کەسایەتی و ریکخراوێک کە بیەوێت بێتە نێو بەرەکەوە و لە کاری نیشتمانیدا ئامادەیی هەبێت”.
لەسەرکارو چالاکیەکانی سەکۆکە نەبەز خالید باسی لەوەشکردووە، هەموو پرسێکی نیشتمانی کاری سەکۆ و بەرەکەیان دەبێت، وەک پرسی سیاسی و کۆمەڵایەتی و جوگرافی و جێندەری و زۆر کاری تر.
نەبەز خالید وتیشی ، کە دوور لە هەموو ئاین و یایدۆلۆژیاو بیرکردنەوەیەکی تەسکی حزبی بڕیاریان داوە پێکەوە کاری نیشتمانی بکەن کە خۆی دەبێنێتەوە بوارەکانی کاری سیاسی و کۆمەڵایەتی و ژیاری و هەر بابەتێکەوە کە پەیوەست بێت بە نیشتمانەوە بە نمونەی هەڕەشەکانی سەر خاکی کوردستان و داگیرکاری وڵاتان و پێشێلکردنی مافەکانی تاکی کوردستانی لە هەر شویێنێک بێت.
وتەبێژی دەستە کاتیەکە ئەوەشی ڕاگەیاندووە، داوا لە هەموو ئەوکەس و هێز و ڕێکخراو دەستانە دەکەین کە ئامانجیان کاری هاوبەشە لەپێناو نیشتماندا با بێنە پێشەوەو ئێمە ئامادەکاریمان کردوە بۆ کاری هاوبەش و هەموو پێکەوە دەبنە بەشێک لە چارەسەری کێشەو گرفتەکانی کۆی نیشتمانەکەمان دوور لە هەر جیاوازییەک کە لە نێوانیاندا هەبێت.
