ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
هاوسەرۆکی هەرێمی کەرکوکی تەڤگەری ئازادیی رایدەگەیەنێت، تاکەرێگە لەبەردەم کەرکوکییەکاندا ئاشتیی و پێکەوەژیان و نەتەوەی دیموکراتیکە، هیچ رێگەیکی تر جگە لەنەتەوەی دیموکراتیک، جگە لە خۆبەڕێوەبەریی دیموکراتیک لەبەردەم ئێمەی کەرکوکیی و گەلانی عێرقدا نییە.
کۆمەڵ سەرمەد هاوسەرۆکی هەرێمی کەرکوکی تەڤگەری ئازادیی کۆمەڵگەی کوردستان بۆ ماڵپەڕی تەڤگەری ئازادیی دەدوێت و باردۆخی سیاسیی کەرکوک و ئەو ئاژاوەیەی هاتەئاراوە هەڵدەسەنگێنێت و رێگەچارەی سیاسیی و ئەڵتەرناتیفی تەڤگەری ئازادیی بۆ شاری کەرکوک ئاشکرا ئەکات و رایگەیاند، ئەوەی لە رابردوودا لە شاری کەرکوک روویدا پیلانگێڕیی بوو، ویستیان فیتنەکی گەورە لە کەرکوکدا دروست بکەن، وتی: ئەوەی لای خەڵکی کەرکوک ناخۆش بوو دروشمی نەتەوەپەرستیی دەوترایەوە و پارێزگاری کەرکوک بەوەکالەت نەیتوانیوە پارێزگارێکی تەواوی گەلانی کەرکوک بێت. هەروەها هەتا ئێستاش هێز لە ناوکەرکودا هەیە.
راشیگەیاند: ئێمە ئەڵێین ئەگەر ئیجرائاتی جددیی نەکرێت ئەوا دەوڵەتانی تر دەستێوەردانی دیکە لە شاری کەرکوکدا ئەکەن. لەکۆبوونەوەماندا وەک تەڤگەری ئازادیی لەگەڵ پارت و لایەنە سیاسییەکانی کەرکوک و نوێنەری سەرۆک کۆمار، ئێمە پێشنازی ئەوەمان کرد بۆ ئەوەی ئەم فیتنەیە دووبارە نەبێتەوە ئەبێت ئیجرائاتی جددیی بکرێت، ئەگەر وانەبێت ئەوا دەرگا دەکاتەوە لە دەستێوەردانی دەوڵەتانی هەرێمیی و پێکدادانی نەتەوەکان لەشاری کەرکوکدا دروست ئەبێت، ئینجا ئەبێت ئیجرائاتەکان خێرا و لە ئێستادا جێبەجێ بکرێت: یەکەم، پارێزگاری بەوەکالەت سزابدرێت چ یاسایی و چ ئیدارایی، لەبەر ئەوەی نەیتوانیوە بێلایەنی خۆی بپارێزێت، دووم، هێزی سەربازیی لە ناوشار دوور بخرێتەوە، لەبەر ئەوەی بێلایەن نەبووەنە و بە یەک چاو سەیری رۆڵەکانی ئەم نیشتمانەیان نەکردوە.
جەختی لەوەشکردەوە: ئێمە لە رابردوودا تاکە لایەن بووین ئەمان وت ئاشتیی و پێکەوەژیان تاکەرێگەیە لەبەردەمی کەرکوک و گەلانی عێراقدا، لە دواین کۆبوونەوەی ئەحزابی سیاسیی دا، بەشێکیان گەیشتوونەتە ئەو قەناعەتەی کە ئێمە وتوومانە. هەروەها بەشێک لە ئەحزابی تورکمانیی و عەرەبیی گەیشتوونەتە ئەو قەناعەتەی تاکە رێگە لەبەردەم کەرکوکییەکان و گەلانی عێراق ئاشتیی و پێکەوەژیان و نەتەوەی دیموکراتیکە، هیچ رێگەیکی تر جگە لەنەتەوەی دیموکراتیک، جگە لە خۆبەڕێوەبەریی دیموکراتیک و ئاشتیی و پێکەوەژیان لەبەردەم ئێمەی کەرکوکیی و گەلانی عێرقدا نییە. هەروەها بەشێک لە حیزبە سیاسییەکانی کەرکوک گەیشتوونەتە ئەو قەناعەتەی کە دەست لە دروشمی ناسیۆنالیزمی و نەتەوەپەرستیی دژی یەک بەربدەین.
هێمای بۆ ئەوەشکرد، بەشێک لە پارتە سیاسییەکان لە کەرکوکدا بە ئەجێندای وڵاتانی دەرەکیی و هەرێمیی دروشمی قەومیی ئەڵێنەوە و بوونەتە مایەی سەرئێشە و فیتنە بۆ گەلانی کەرکوک.
کۆمەڵ سەرمەد جەختی لەوەکردەوە: لەم قۆناغەدا بۆ شاری کەرکوک نەتەوەی دیموکراتیک زەرورەتێکی حەتمییە، لەبەر ئەوەی لە سیی ساڵی بەعس لەم شارەدا بە عەقڵیەتی عوروبەوە حکومی ئەم شارەی کرد، بەڵام نەیتوانی بگاتە ئامانجەکەی! هەروەها دەسەڵاتی کوردییش ١٥ ساڵ ئەم شارەیان بەڕێوەبرد و ئیدارەیەکی باشیان نەدا، نەیانتوانی ئەو عەقڵییەتە ناسیۆنالیستییە لەم شارەدا هەیە بیسڕنەوە و نەیانتوانی خزمەتێکی باشی ئەم شارە بکەن. نەتواندرا زەمانی نەتەوەکانی تر بدرێت لە ژێر سایەی ئیدرارەی ئەواندا بە ئارامیی و خۆشگوزەرانیی پێکەوە بژین لەم شارەدا. وتیشی: گەلی کورد، گەلی تورکمان، گەلی عەرەب ئیدی لەوە تێگەیشتوون بە لەناوبردنی یەکتر کێشەکان چارەسەر ناکرێن، بە دەیان ساڵە یەکتریی رەتدەکەینەوە نەمانتوانییوە کێشەکان چارەسەر بکەین.
هاوسەرۆکی هەرێمی کەرکوکی تەڤگەری ئازادیی وتیشی: لەبەرامبەر عەقڵیەتیی ناسیۆنالیستیی و قەومیی کە ئەجێندای دەرەکییە، تاکە رێگەیەک کە ماوەتەوە ئەوەیە پەرە بە عەقڵیەتی نەتەوەی دیموکراتیک بدەین و ئەگەر کەمیش بێت بە شێنەیی خەریکە ئەبێتە بەدیلێک بۆ ئەو عەقڵییەتەی لە شاری کەرکوک دا هەیە. پێویستە وەکو هێڵێکی ئەساسیی هەموو نەتەوەکان دیین و مەزهەبەکان: چ کورد، عەرەب، تورکمان، شیعە، سننە، کاکەکیی، سریانیی، کلدان، ئاشور، سابیئە و بەهائیی و ئێزیدی و زەردەشتیی لە شاری کەرکوک هەموو پێکەوە لەبەرامبەر عەقڵیەتێک کە ئەجێندایەکی دەرەکیی هەیە و ئەبێتە مایەی فیتنە بۆ ئەم شارە کە عەقڵیەتی ناسیۆنالیزمیی و قەومییە، لەبەرمبەر ئەمە هێڵی نەتەوەی دیموکراتیک گەشەپێبدەین.
