کەنەکە: شێوەی پێشوازیی لە فیدان لە هەولێر مایەی شەرمەزارییە

کۆنگرەی نەتەوەیی کوردستان رایگەیاند، وەزیری دەرەوەی تورک هاکان فیدان بە جۆرێک کە مایەی شەرم و تەریقبوونەوەی مرۆڤە لە هەولێر پێشوازیی لێکراوە و سەرنجی راکێشا بۆ سەر رۆڵی فیدان لە تیرۆرکردنی دەیان جەنگاوەر و پێشەنگی کوردان.

دەستەی بەڕێوەبەری کۆنگرەی نەتەوەییی کوردستان (کەنەکە) رایگەیاندراوێکی باڵاوکردەوە و تیایدای هاتووە: سەردانی وەزیری دەرەوەی تورک هاکان فیدان بۆ عێراق  و باشووری کوردستان لەپێناو رەوایەتیدان و درێژەپێدانە بە هێرشەکانی ئەنقەرە بۆ سەر هەرێم.

ئەوەشی خستەڕووە، کە لەو چوار دەوڵەتەی لە کوردستان باڵادەستن؛ لە رووی دەستوری هەمیشەییەوە عێراق ماف و هەبوونی کوردان بە فەرمی دەناسێت، بەڵام دەوڵەتی تورک دەیەوێت راپێچی سەر هێڵی خۆی بکات و بیگەڕێنێتەوە بۆ سەردەمی سەدام.

ئەوەشی خستەڕوو، کە خواست و نیازی دەوڵەتی تورک ‘لەناوبردنی سەرجەم بەرژەوەندیی و دەستکەوتەکانی گەلی کورد’ە و ئاماژەی بە هەڵوێستی تورکیا لە کاتی ریفراندۆمی سەربەخۆیی کرد کە بەر لە شەش ساڵ ئەنجامدرا.

ئەگەر دوژمن سپاس و ماڵئاواییتان لێبکات دەبێت دە جار بیری لەبارەوە بکەنەوە

کەنەکە شێوەی پێشوازی لە هاکان فیدان لە هەولێری وەک هەڵسوکەوتێکی مایەی شەرم پێناسە کرد و رایگەیاند، ژمارەیەکی زۆر جەنگاوەر و پێشەنگی کورد بە بڕیاری هاکان فیدان و ئەو دەزگایەی سەرکردایەتی دەکرد، تیرۆر کران.

ئاماژەی بەوەکرد، کە هاکان فیدان سوپاسی سەرۆکوەزیرانی حکومەتی باشوری کوردستانی کردووە و رایگەیاند، “ئەگەر دوژمن سوپاس و ماڵئاوایی لێکردن دەبێت دە جار لەو بارەیەوە بیر بکەنەوە”.

لە راگەیەندراوەکەی کەنەکەدا هاتووە کە پارتی لە بری هەڵوێست وەرگرتن لە دژی هێرشەکانی دەوڵەتی تورک، ئاسانکاریی بۆ ئەو هێرشانە دەکات و ئەوەش خرایەڕوو کە لە کاتی کۆمەڵکوژیەکانی پێنجوێن، سیدەکان و برادۆست کە لە کاتی سەردانەکەی فیدان بۆ هەولێر ئەنجامدران، بەڕێوەبەرایەتی باشوور بێدەنگ بوون.

بانگەواز بۆ حکومەتی عێراق و پارتی

کەنەکە داوای لە حکومەتی عێراق کرد کە هاوکاریی دەوڵەتی تورک نەکات، هەروەها داواشی کرد کە بەرامبەر بە هێرشەکانی دەوڵەتی تورک بوەستێتەوە.

داواشی، لە پارتی کرد و رایگەیاند کە دەبێت دەستبەرداری هەڵوێستەکەیان بن کە خۆیان خستووەتە پاڵ دەوڵەتی تورکیا و پێویستە بگەڕێنەوە بۆ سەر هێڵی نەتەوەیی؛ داوایشی لە سەرجەم هێزەکانی کوردستانیش کرد بەرامبەر بە داگیرکەران بوەستنەوە و لە تێکۆشانی ئازادییدا بەشداربن.

کەنەکە هەروەها سڵاوی ئاڕاستەی ئەو هێزانە کرد کە لە زاپ، مەتینا و ئاڤاشین لە دژی سوپای تورکی داگیرکەر خۆڕاگری دەکەن.

 

هەروەها چێکی بکە

بارێنا پەرلەمانتاری ئەوروپا: عەبدوڵا ئۆجالان لەسەر ئاستی نێونەتەوەیی مەرجەعێکی سیاسیە

ئەندامی پەرلەمانی ئەوروپا پیرناندۆ بارێنا باسی لەوەکرد، کە عەبدوڵا ئۆجالان لەسەر ئاستی نێونەتەوەیی مەرجەعێکی سیاسیە …