ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
شاندێکی تەڤگەری ئازادیی، بە مەبەستی پیرۆزباییکردنی نۆیەمین ساڵەوەگەڕی شۆڕشی ڕۆژئاوا، سەردانی نوێنەرایەتیی ئیدارەی خۆبەڕێوەبەریی باکوور و ڕۆژهەڵاتی سوریایان لە هەرێمی کوردستانی کرد.
ئەمڕۆ، شاندێکی تەڤگەری ئازادیی کۆمەڵگەی کوردستان بە سەرۆکایەتیی محەمەد عەبدوڵا، هاوسەرۆکی تەڤگەری ئازادیی، سەردانی نوێنەرایەتیی ئیدارەی خۆبەڕێوەبەریی باکوور و ڕۆژهەڵاتی سوریایان لە هەرێمی کوردستانی لە شاری سلێمانی کرد و لەلایەن شاندێکی نوێنەرایەتیی ئیدارەی خۆبەڕێوەبەرییەوە پێشوازییان لێکرا.
لەو سەردانەدا، تەڤگەری ئازادیی بەبۆنەی نۆیەمین ساڵیادی شۆڕشی ڕۆژئاوای کوردستانەوە، پیرۆزبایی خۆی ئاڕاستەی نوێنەرایەتییەکە کرد و هیوای پێشکەوتن و سەرکەوتنی زیاتریان بۆ خواستن.
ئازاد محەمەد، هاوسەرۆکی هەرێمی سلێمانی تەڤگەری ئازادیی کۆمەڵگەی کوردستان، ڕایگەیاند: خۆبەڕێوەبەریی باکور و ڕۆژهەڵاتی سوریا بووەتە ئومێد، بۆ گەلانی سوریا و ڕۆژهەڵاتی ناوەڕاستیش، کە توانیویەتی ئازادیی و پێکەوەژیان بەدیبهێنێت.
ئاماژەی بەوەشکرد، گەلی کورد دەبێت پێکەوە هەوڵبدات، کە خاوەنداریی لە دەستکەوتەکانی ڕۆژئاوا بکات و هەوڵیش بدرێت ستاتۆی ڕۆژئاوا لەئاستی نێودەوڵەتییدا بەفەرمیی بناسرێت.
