ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
هاوسەرۆکی هەرێمی راپەڕیینی تەڤگەری ئازادیی بە ماڵپەڕی تەڤگەری راگەیاند، پارتی چاوساغیی بۆ تورکیا دەکات ھەرێمی کوردستان داگیربکات، ھەوڵی ئەوە ئەدەن، ئارامیی سلێمانیی و شوێنەکانی دیکە بشێوێنن و بۆ ئەوەی ھەڵبژاردن زیاتر دوابخەن و بەردەوامیی بەو دەسەڵاتدارییەیان بدەن. جەختیکردەوە: لایەنە سیاسییەکانی هەرێمی کوردستان، ئێستا لەغەفڵەتی ئەوەدا دەژین تورکیا تەنھا بەدوای گەریلای پەکەکەوەیەو دوژمنی ئەوان نییە و بەشێکی زۆر لە راگەیاندنی هەرێمی کوردستانیش، جورئەتی باسکردن و بەدواداچونییان بۆ ئەو دۆخی هێرش و داگیرکارییەکانی تورکیا نییە.
سەید خالید هاوسەرۆکی هەرێمی راپەڕیینی تەڤگەری ئازادیی کۆمەڵگەی کوردستان لەبارەی هاتنی چەندیین کاروانی سەبازایی سوپای تورکیا بە چەکی قورسەوە بۆ ناو خاکی هەرێمی کوردستان، بە ماڵپەڕی تەڤگەری راگەیاند: “وەک ئاشکرایە دەوڵەتی داگیرکەری تورکیا، بۆ ھاوینی ئەمساڵ پلانێکی گەورەی بۆ ھێرش کردنە ھەرێمەکانی گەریلا لە سنورەکانی باکور و باشوری کوردستان داڕشت بوو، چەندیین جار ھەڕەشەی لەناو بردنیان دەکرد. لەرووی دیپلۆماسیی و سیاسییشەوە ھەوڵێکی زۆریدا، بەردەوامیشە لەگەڵ حکومەتی عێراق، چەندیین رێککەوتنی لە بواری ئەمنیی و ئاڵوگۆڕی زانیاریی ئەنجامداوە و هەروەها لەگەڵ ئێران بەھەمان شێوەیە، بەڵام پێشھاتەکان و رووداوەکان، بەتایبەت کاتێک ئەردۆغان لە ھەڵبژاردنە خۆجێییەکان شکستی ھێنا و ئاستی رووداو و پێشھاتەکان بەشێوەیەک بوون کە پێناچێت بەدڵی تورکیا بێت.”
باسی لەلایەنی هاوکاری داگیرکارییەکانی تورکیا کرد لە هەرێمی کوردستان و وتی: “ئەوەی تیایدا ھاوکار و ھاندەرە، بۆ بەردەوامیی بەھێرشەکان بۆسەر ھەرێمی کوردستان، سیاسەتی پارتی دیموکراتی کوردستانە، بە راستەوخۆ و ناڕاستەوخۆ ھاوکار و چاوساغیی بۆ تورکیا دەکات بۆ داگیرکردنی هەرێمی کوردستان، هەتا ئەو رادەیەی ھەوڵی ئەوە ئەدەن، ئارامیی ناوچەکانی سلێمانیی و شوێنەکانی دیکەش بشێوێنن و تێکبدەن! ئەمەیش بەو ئامانجەی لە دۆخی پشێویی و ئاڵۆزدا، ھەڵبژاردن زیاتر دوابخەن و بەردەوامیی بەو دەسەڵاتدارییەی ئێستا بدەن. ئەو کورت بینییە و بەرژەوەندییخوازییە، ئەگەر بۆ ماوەیەکی کورتیش بێت سودێکیان پێ بگەیەنێت، بێگومان لەماوەی درێژدا، پێش ھەموو کەس دەکەونەژێر بارێکی قورس کە ناتوانن لێی دەربچن “.
ئاماژەی بەوەشکرد، “ئێستا پارلمان و حکومەتێکی شەرعیی لە هەرێمی کوردستان دا نییە، ئەوەی ھەیە بەتەواوی دەسەڵاتێکی حیزبیی و بنەماڵەییە و چۆنیان بوێت بەوشێوەیە بڕیار و فەرمان دەرئەکەن، ھیچ ھەڵوێست و بڕیارێک بەناوی حکومەتی ھەرێمی کوردستانەوە، شەرعییەتی نەماوە!“
هێمای بۆ ئەوەشکرد، “لایەنە سیاسییەکانی هەرێمی کوردستان، ئێستا لەغەفڵەتی ئەوەدا دەژین کە تورکیا تەنھا بەدوای گەریلای پەکەکەوەیەو دوژمنی ئەوان نییە!؟ یان لەپرۆسە داگیرکاریی و گۆڕانکارییەکانی ناوچەکە تێنەگەیشتوون؟ تورکیا دەیەوێت پێش رووداوەکان، لەناوچەکەدا پێگەی کورد لەھەر بەشێکی کوردستان دا کە هەیە لاوز بکرێت و رۆڵ و پێگەی نەبێت؛ هەربۆیە دەوڵەتی تورکیا لە روی ستراتیژییەوە لە سنوری میساقی میللییەکەیان، کار بۆ داگیرکاریی دەکات.”
سەید خالید، بۆ ماڵپەڕی تەڤگەر باسی لە هێرشی چەکی کیمیایی و چەکە قەدەغەکراوەکان کرد لە لایەن سوپای تورکیاوە لە سەرخاکی هەرێمی کوردستان و وتی: “ئەوەی ئەمڕۆ لە مەیدانەکانی شەڕی دژی داگیرکارییدا روودەدات، ھەر لە بەکار ھێنانی چەکی کیمیایی و چەکە قەدەغەکراوەکان، لەبەرامبەر سەنگەرەکانی گەریلا لەزاپ و مەتینا و گارە و شوێنەکانی دیکە، ئەوە شەڕێکی ئەفسانەیی و داستانێکی مێژوویین، ئەمەیش بۆ بەرگرییە لە دەسکەوتی ھەموو کورددان. هەروەها بەرگرییە لە مانەوەی حکومەتی ھەرێمێکی خاوەن بڕیار و بەھێز لە هەرێمی کوردستان، جێی داخێکی گەورەیە حیزب و رێکخراوە سیاسیی و مەدەنییەکان، ئەو راستییە نەبیینن و خۆیان لەو بەرپرسیارییەتییە بشارنەوە، بێدەنگیی و بێھەڵوێستییان دەکەوێتە خانەی بەرژەوەندیی داگیرکەران و بەھەمان شێوە بەشێکی زۆر لە راگەیاندنی هەرێمی کوردستان، جەرائەتی باسکردن و بەدواداچونی بۆ ئەو دۆخە نییە.“
هاوسەرۆکی هەرێمی راپەڕیینی تەڤگەری ئازادیی دەشڵێت: “هەر حیزب و رێکخراوێک یان ھەر گرووپ و راگەیاندنێک، نەتوانێت ھەڵوێست و بەدواداچونێکی ھەبێت لەبارەی رووداوگەلێک کە لەسەر خاکی خۆی رووئەدەن، دەبێت چاوەڕێ چیان لێ بکرێت؛ بێجگە لەشەرمەزار بوون و تەسلیم بوون، هاووڵاتییانی ئێمە ھەموو ئەوانە دەبینێت، ئێستا بە ئاشکرا دیارە ئەو ھێزانە چەندە نوێنەرایەتیی هاووڵاتییان دەکەن، ھەر لەبەر ئەوەیە ناتوانن بچنە ناو ھەڵبژاردنێکەوە کە هاووڵاتییان بڕیاری خۆی بدات.
