تەڤگەری ئازادیی راگەیاندراوێکی بڵاوکردەوە

ساڵیادی کۆمەڵکوژیی شاری قەڵادزێ

ئەمڕۆ ٢٤/٤/٢٠٢٤ نیو سەدە تێدەپەڕێت، بەسەر ئەو کۆمەڵکوژیی و زامە قوڵ  و  سارێژ نەبووەدا کە لەلایەن رژێمی بەعسی لە ناوچوو، لەدژی خەڵی ئەو شارە خۆڕاگرە  ئەنجامیدا.

لەکاتێکدا یادی ئەو تاوان و کۆمەڵکوژییانە دەکەینەوە،  کە لەمانگی نیساندا رویانداوە، وەک ئەنفال و کیمیاباران لەساڵی ١٩٨٨، ئەو برینەقوڵانە ساڕێژ نەبوون  و بەردەوم ئازار و خوێنیان لێ دەچۆڕێت.

دەڤەری پشدەر، بەردەوام  لەژێر ئەو ھێرش و پەلامارانەدا بووە و ھیچ کات چۆکی بۆ دوژمنان دانەداوە؛ دەڤەری پشدەر وەک ناوچەیەکی گرنگ و ستراتیژیی لەرووی ئاسایشی نەتەوەیی و خۆپاراستنەوە، بۆ گەلی کورد گرنگە و رۆڵێکی بەرچاویشی هەبووە لە ژیاندن و بەردەومیی دان بەتێکۆشانی شۆڕشگێڕانی کوردستان. لە مێژووی دوورو نزیکدا، هەمیشە سەنگەری لەشکان نەهاتووی دژ بەداگیرکەران و پشتوپەنای شۆڕشگێڕانی هەرچواربەشی کوردستان بووەو ھەرواش دەمێنێتەوە.

نیو سەدە بەر لە ئێستا، ئەو شارە رەنگین و خۆڕاگرە لە ٢٤/٤/١٩٧٤  رووبەڕووی بۆمبارانی نامرۆڤانەی فرۆکە شەڕکەرەکانی رژێمی بەعسی بوویەوە و بەچەکی ناپاڵم و قەدەغەکرا و ناوەندیی شارە کە یان بۆمبارانکرد. کۆمەڵکوژییەکی گەورەیان، لەبەرامبەر دانیشتوانی خۆڕاگرو کورد پەروەری  شاری قەڵادزێدا ئەنجامدا، کە بووە هۆی شەهید بوونی زیاتر لە ١٥٠ هاووڵاتیی کە نیوەیان زیاتر ژن و منداڵ و بەساڵاچووبوون. هەر لەو بۆمبارانەدا نۆ خوێندکاری زانکۆی سلێمانی شەهید بوون، ژمارەیەکیش لە خوێندکار و مامۆستای زانکۆی سلێمانی بریندار بوون کە لەو کاتەدا وەک پەناگەیەکی ئارام بۆ بەردەوام بوون لە خوێندن  هاتبوونە ئەو شارە.

ناوچەی  پشدەر لە مێژووی خەباتی بزوتنەوەی ئازادییخوازیی گەلی کورددا، هەمیشە بە ماڵی گەورە و سەنگەری نەتەوەیی  تێکۆشەران و نیشتمان پەروەران و شۆڕشگێڕانی کوردستان ناسراوە. هەربۆیە دووژمنانی گەلی کورد، بەردەوام ویستوویانە تۆڵەی لێبکەنەوە و ئەو هزر و هێزو ئیرادەیەی بشکێنن و خەڵکە قارەمانەکەی لە شۆڕش و تێکۆشان دور بخەنەوە، بەڵام هەرچییەکیان کرد، نەیان توانی ئیرادەی شۆڕشگێڕانەی خەڵکی دلێری ئەم دەڤەرە بشکێنن، لەساڵی ١٩٨٢ خەڵکی کۆڵنەدەری  قەڵادزێ، پێشەنگایەتیی خۆپێشاندانەکانی کرد و جارێکی تر ئیرادە و هێزی بۆ گەل ژیاندەوە،  لە بەرامبەردا بەعسییەکان وەک تۆڵەیەک سیاسەتی خاپورکردن و راگواستن و چۆڵکردنی دەڤەری پشدەریان لە ١٩٨٨ – ١٩٨٩  لە بەرامبەر دەڤەرەکە ئەنجام دا، بەڵام نەوەک هەرنەیان توانی ئیرادەی گەل بشکێنن، بەڵکو خەڵکی وڵاتپارێزی دەڤەری  (بتیوێن و پشدەر) لە ئازاری ساڵی ١٩٩١دا، بە راپەڕینی جەماوەریی و سەرتاسەریی وەڵامی یەکلاکەرەوەی دانەوە و کۆتاییان بە داگیرکاری یو ستەمی بەعسییەکان هێنا و لە کوردستانیان وەدەرنان.

ئێستا رژێمە فاشیستەکان، بەتایبەت دەوڵەتی تورکیا بە شێوازی سەربازیی و چەکی قەدەغەکراو، بەردەوامیی بەو کۆمەڵکوژییانەی گەلی کورد ئەدات و رۆژ نییە خوێنی کوردێک نەڕێژێت. لەرۆژگاری ئەمڕۆدا کە یادی ئەو رۆژە تاڵانەدەکەینەوە، سەرەڕای ئەو دەسکەوتانەی بەخوێنی هەزاران شەهید بە دەستهاتوون، بەهۆی ناکۆکیی و ململانێی حیزبە دەسەڵاتدارەکان و دورکەوتنەوەیان  لە بەرژەوەندییەکانی گەل، دوای نزیکەی ٣٣ ساڵ لە بەڕێوەبردن و دەسەڵاتدارییان نەیانتوانیوە ئەو زامانە ساڕێژ بکەن و نەبوونەتە وەڵام بۆ ویست و داخوازییەکانی گەل، بەڵکو  بەھۆی ئەو درز و کەلەبەرانەی دەسەڵاتدارانی بەرژەوەندییخواز دروستیانکردووە، ئەوەندەی تر نەھامەتیی و ئازارەکانیان قوڵتر کردوەتەوە!

دەوڵەتانی داگیرکەر، بەھاوکاریی ھێڵی خیانەت بەردەوامن لەھێرش و تیرۆر و کۆمەڵکوژییکردن بەرێباز و شێوازی جیاواز. بە ئاشکرا سنورەکان و سەروەرییەکانی خاک و ئاسمانی کوردستان پێشێل دەکەن، بەردەوام  سنورەکانی ئەو ناوچەیە بۆردومان دەکەن و دەیان ھاووڵاتیی بەو ھۆیەوە شەھید و بریندار بوون،  لەبەرامبەردا دەسەڵاتداران لە ھەرێم و  لە حکومەتی ناوەند، بێدەنگ و بێهەڵویستن و ئەوەش ئەوەندەی تر خەڵکی ئەو ناوچانەی تووڕە و نیگەرانکردووە، ئەمە لەجیاتی ئەوەی ھەرێمی کوردستان و حکومەتی فیدراڵ ئاوڕێکی خزمەتگوزاریی و قەرەبوکردنەوەی ماددیی و مەعنەویی لێبدەنەوە؟ بەپێچەوانەوە بێ ھەڵوێست و لاوازانە رێگریی لەنارەزایەتییەکانی گەلیش دەکەن دژ بەو ھێرش و داگیرکارییانە.

ئێستا دووژمنانی گەلی کورد، بەهەمان عەقڵیەتی شۆڤێنیستیی و داگیرکاریی، بەردەوامن لە کاولکاریی و کۆمەڵکوژیی لەسەر گەلەکەمان،  بەتایبەت دەوڵەتی داگیرکەری تورک، لە رۆژئاوا و باشور و باکوری کوردستان، چەندین تاوان و کۆمەڵکوژییان لەسەر گەلی کورد ئەنجامداوە. هەربۆیە داگیرکەرانی کوردستان، بەسودوەرگرتن لە ناکۆکیی هێزەسیاسییەکان و بێدەنگیی نیودەوڵەتیی و تیرۆر و کاولکاریی و کۆمەڵکوژیی زیاتر، لەسەر گەلی کورد ئەنجام ئەدەن. بەوھۆیەوە گەلی کورد، رووبەڕووی چەندین کۆمەڵکوژیی بووەتەوە، هەر لە کیمیابارانکردنی هەڵەبجە و ئەنفالەوە تا دەگات بەکۆمەڵکوژکردن و بێسەروشوێنکردنی بە هەزاران ژن و منداڵی ئیزیدی لە شەنگال  لەلایەن تیرۆریستانی داعش، هێرش و داگیرکردنی عەفرین و سەرێکانی و گرێسپی  و تاڵانکردن و دەربەدەرکردنی خەڵکەکەی لەلایەن سوپای داگیرکەری تورکیا بەبەرچاوی جیھانەوە. ئێستا ئامانجی دەوڵەتی تورکیا، لەو ھێرش و ئۆپەراسیۆنانەی داگیرکردنی باشوری کوردستانە، ئەوان نەیان شاردوەتەوە لەھەر کوێیەکی جیھان بێت دژبەھەرکیان و دەسکەوتێکی گەلی کوردن.

هەربۆیە دەبێت گەلەکەمان، خاوەن ھەڵوێست و یەکگرتووبێت و  رووبەڕووی ئەو داگیرکارییە پلان بۆ داڕێژراوە ببێتەوە.

لەکاتێکدا دەسەڵاتدارانی ھەرێمی کوردستان، کۆمەڵگەی باشوری کوردستانی خستوەتەبەردەم ئاییندەیەکی ناڕوون و شێواو و دامەزراوە نیشتمانییەکانیان پەک خستووە. دەسەڵاتدارانەی ئێستای ھەرێمی کوردستان، خۆیان و پێگەی دەستوریی باشوری کوردستانیان لاوازکردووە،  دەرگایان بەرووی دوژمناندا کردوە تەوە.

کاتی ئەوە هاتووە، ھێز و دەنگە بوێر و ئازادەکان  هەمووان پێکەوە رێگریی لەخیانەت و  داگیرکاریی و کۆمەڵکوژیی بکەین، برینی  قوڵی کۆمەڵکوژییەکان ساڕێژ بکەین، ئەوەش تەنھا بە ھێزی یەکگرتوویی گەل و تەواوی ئازادییخوازان دەکرێت. ئیتر بابەسبێت ناکۆکیی و دووبەرەکیی و خۆخۆریی و وابەستەبوون بە داگیرکەران، تەنھا سیاسەتی دیموکراتیی و پێکەوەبوون و بەهێزکردنی یەکێتیی نەتەوەییمان، تاکە رێگەیە بۆپاراستنی گەلەکەمان، لە شەڕ و کۆمەڵکوژییەکان.                                                               

وەک تەڤگەری ئازادیی کۆمەڵگەی کوردستان،  وەک ئەرکێکی ئەخلاقیی و سیاسیی و  نیشتمانیی لەبەرەی گەلدا بەردەوام دەبین لەتێکۆشان، لەدژی داگیرکەران و نۆکەرانیان، پەیمان ئەدەین تابەدیهێنانی ئامانجە پیرۆزەکانی سەرجەم شەهیدانی رێگەی ئازادیی و سەرفرازیی کوردستان و بنیات نانی سیستمێکی خۆبەڕێوەبەر و  دیموکراتیی، ئەو تێکۆشانە بەھێزتر و فراوانتر دەکەین. نەمریی و شکۆمەندیی بۆ شەهیدانی ٢٤/٤ ی قەڵادزێ و سەرجەم شەهیدانی رێگەی ئازادیی  کوردستان.                                                                        

تەڤگەری ئازادیی کۆمەڵگەی کوردستان – ئەنجومەنی هەرێمی راپەڕین

                                                                        ٢٠٢٤/٤/٢٤

هەروەها چێکی بکە

تەڤگەری ئازادیی لەبارەی رەوشی سیاسیی هەرێمی کوردستان و عێراقەوە بەیاننامەیەکی بڵاوکردەوە

لەبارەی دۆخی عێراق و هەرێمی کوردستانەوە  تەڤگەری ئازادیی کۆمەڵگەی کوردستان، لەبارەی بەدۆخی ئێستای هەرێمی  کوردستان …