لە شاری رانییە دژی هێرشەکانی دەوڵەتی تورک گربوونەوەیەک بەڕێوەچوو

گرووپی کۆشان لە شاری رانییە، دژی هێرشەکانی دەوڵەتی تورک بۆ سەر باکوور و رۆژهەڵاتی سووریا، گردبوونەوەیەکی سازدا.

ئێوارەی ئەمڕۆ شەممە ١٢/٣٠، گرووپی کۆشان بۆ پرسە نەتەوەیی مرۆییەکان لەشاری رانییە، گردبوونەوەیەکی ناڕەزایەتیی دژ بەو ھێرش و پەلامارانەی دەوڵەتی تورک بۆسەر باکوور رۆژھەڵاتی سوریا بەڕێوەبرد و لە گردبوونەوەکەدا سەلام عەبدوڵا هاوسەرۆکی گشتیی تەڤگەری ئازادیی کۆمەڵگەی کوردستان بەشدار بوو.

ستار رەسول بەیاننامەی گردبوونەوەکەی خوێندەوە وێڕای شەرمەزارکردنی دەوڵەت تورک، داوای   لە ھێزە سیاسیی و رێکخراوەکان کرد خاوەن ھەڵوێست بن، ھەروەھا بێدەنگیی و بێھەڵوێستیی کۆمەڵگەی نێودەوڵەتیی و رێکخراوی نەتەوە یەکگرتووەکان شەرمەزارکرد.

دەقی بەیاننامەکە:

«ئەوەی لەبەر نیشتیمان دەڕوات و جۆگەلەی بەستووە ئاو نییە! ئەوە خوێنی رۆڵەکانییەتی»

ھاوونیشتمانییانی دڵسۆز و بەھەڵوێستـ….

هاوخەمانی ڕۆژئاوای بریندار…

وەک ئاگادارن دەوڵەتانی داگیرکەر بەگشتیی و  بەتایبەت ده‌وڵه‌تی توركیای فاشست، به‌رده‌وامه‌ له‌ هێرشه‌كانی بۆسه‌ر تەواوی دەستکەوتەکانی گەلی کورد و لە ئێستاشدا سەرنجی پەلامار و داگیرکاری خۆی لەسەر ڕۆژئاوای كوردستان چڕکردووەتەوە، ئەمەش دوای شکستە گەورەکەی سوپای داگیرکەر لە گۆڕەپانەکانی شەڕ لە (زاپ و مەتینا و کوڕەژارۆ)ی سنووری سەپێنراوی نێوان باکوور و باشووری کوردستان؛ جێی ئاماژەیە، دەوڵەتی تورکی داگیرکەر  لە ٢٣ ی ئه‌م مانگه‌وە بەشێوەیەکی چڕو بەردەوام کە تا ئێستاش بەردەوامە  دوور لەھەموو یاسا و پێوانەیەکی جەنگ، دەیان  ده‌زگا و دامه‌زراوه‌ی مەدەنی و خزمه‌تگوزاری و کارگە و  شوێنی دانیشتوان، كه‌ پێویستی ژیانی ڕۆژانه‌ و خزمەتگوزاری گشتین كردووەتە ئامانج و له‌كاری خستوون، کە لە ئاکامدا چه‌ندین ھاوڵاتیی مەدەنی  شه‌هید و برینداربوون.

گومانی تێدانییە، دەوڵەتی تورک ھەرگیز چاوی بە دەسکەوتەکانی گەلەکەمان ھەڵنایەت، دەیەوێت لەو دۆخە ئاڵۆزەی جیھان و  ئەو پەرتەوازەییەی لە ناوخۆدا هەیە، سوود وەربگرێت و داگیرکارییەکانی پەرەپێبدات؛ بەوشێوەیە ئارامی و ژیانی ئاسایشی ڕۆژئاوا تێکبدات.

ڕوون و ڕەوانە، کە ئەم ده‌وڵه‌ته‌ پان‌قەومییە مەزهەبییە، هەموو هاوکێشەکان بە پێوەری بەرژەوەندییە نەتەوەپەرستیی و ئایینگەراکەی خۆی پێوانەدەکات، هەر لەو ڕوانگەیەوە، پێشكه‌وتن و ده‌ستكه‌وته‌كانی ڕۆژئاوای کوردستان و سیسته‌می به‌ڕێوه‌به‌رایه‌تییه‌كه‌ی، كه‌ سیسته‌می خۆبەرێوەبەری دیموكراتییه‌ له‌ باكوور و ڕۆژهه‌ڵاتی سووریا و تێیدا كورد و هه‌موو گه‌لانی ناوچه‌كه‌ی لەخۆ گرتووە، وەک تارمەییەک سەیردەکات و بە مەترسی لەسەرخۆی دەیبینێت! بەتایبەت دوای نووسینەوە و پەسندکردنی پەیمانی کۆمەڵایەتی وەک دەستوورێک بۆ  گەلی کورد و گەلانی سوریا، دیسان کێچ چووەتە کەوڵییەوە و چاوی بەرایی نادات کورد سەردار و کاربەدەستی هیچ بستەزەمینێک بێت!

لێرەوە ڕایدەگەیەنین، کە  ئەو دەوڵەتە دژ بەئازادیەی گەلان ھەر جارەی بە بەھانەیەکی نابەجێ داگیرکاری و کۆمەڵکوژی و تاوانی جەنگ ئەنجام ئەدات، کە جێی داخە جیھان و ھاوپەیمانیی نێودەوڵەتی لێی بێدەنگ و بێھەڵوێستن، ھەر بۆیە ئێمە وەک گرووپی کۆشان بۆ پرسە نیشتیمانیی و مرۆییەکان کە کۆمەڵێک چالاکوان و  کەسایەتی دەڤەری راپەڕیین  لەخۆدەگرێت  وەک ئەرکێکی ئەخلاقی و نیشتیمانیی، وێڕای شەرمەزارکردنی ئەو ھێرش و پەلامارانەی دەوڵەتی تورکیای داگیرکەر، بۆسەر رۆژئاوای کوردستان و دەسکەوتەکانمان، بەتوندی شەرمەزاردەکەین و لەبەرامبەر ئەو هێرش و تیرۆره‌ی توركیا کە له‌دژی گه‌له‌كه‌مان و كه‌مه‌نه‌ته‌وه‌كانی تری ناوچه‌كه ئەنجامی دەدات‌، داوا لە نەتەوەیەکگرتوەکان و ھاوپەیمانی نێودەوڵەتی دەکەین رێگەبگرن لەو داگیرکاریی و وێرانکارییانە، ھەروەھا داوا لە ھەرتاکێکی بە ویژدان و سەرجەم رێکخراوە نێودەوڵەتیی و ھێزە سیاسییەکانی باشووری کوردستان دەکەین، بێدەنگیی بشکێنن و خاوەن‌ھەڵوێستبن لەبەرامبەر ئەو شەڕە داسەپاوەی دەوڵەتی فاشستی تورکیادا، ئێمە تەنھا بە یەکگرتووییمان دەتوانین سەرکەوتن زامن بکەین.

رۆژی یەکگرتن و ھەڵوێست و پێکەوەبوون و یەکگرتنمان، گرەنتی سەرکەوتنمانە.

 سەرکەوتن بۆ ئیرادەی گەلی کورد و گەلانی ئازادییخواز…

شەرمەزاریی بۆ داگیرکاریی و شەڕخوازیی

٣٠/١٢/٢٠٢٣  رانییە

 گروپی کۆشان بۆ پرسە نەتەوەیی و مرۆییەکان

هەروەها چێکی بکە

تەڤگەری ئازادیی لەبارەی رەوشی سیاسیی هەرێمی کوردستان و عێراقەوە بەیاننامەیەکی بڵاوکردەوە

لەبارەی دۆخی عێراق و هەرێمی کوردستانەوە  تەڤگەری ئازادیی کۆمەڵگەی کوردستان، لەبارەی بەدۆخی ئێستای هەرێمی  کوردستان …