ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
بەرپرسی نووسیینگەی بەغدادی تەڤگەری ئازادیی رایدەگەیەنێت، عێراق بە قۆناغێکی هەستیاردا تێدەپەڕێت و دەڵێت، نابێت عێراق و هەرێمی کوردستان خۆیان بکەن بە بەشێک لەو میحوەرانەی لە ناوچەکەدا هەیە، چونکە هیچ رێگە چارەیەکیان بۆ هەرێم و عێراق پێنییە.
حسێن کەرکوکیی بەرپرسی نووسیینگەی بەغدادی تەڤگەری ئازادیی کۆمەڵگەی کوردستان بەماڵپەڕی تەڤگەری راگەیاند، عێراق بە قۆناغێکی زۆر هەستیاری سیاسیی، ئەمنیی، ئابووریی و کۆمەڵایەتییدا تێدەپەڕێت. دۆخی سیاسیی عێراق ئاڵۆزە، لایەنە سیاسییەکانی کورد و شیعە و سونە بڕوایان بە دەستور و قانوون نەماوە، هەربۆیە هەر لایەنێک دەیەوێت خۆی باڵادەستبکات و ئیرادەی خۆی فەرزبکات، ئەم عەقڵییەتە بۆ عێراق چارەسەریی پێنییە.
ئاماژەی بەوەشکرد، شەڕی روسیا و ئۆکراین، شەڕی ئسرائیل و بزوتنەوەی حەماس لە غەززە و ئەو بارودۆخە ئابوورییەی بەسەر جیهاندا هاتووە، ئەمانە وایکردوە ململانێکان لە ناوچەکەدا توند ببێتەوە، بێگومان ئەمەیش کاریگەریی لەسەر عێراق داناوە و عێراقیش بەشێکە لەو ململانێیە. وتیشی: ئێمە زۆر جار وەک تەڤگەری ئازادیی داوامان لە هەرێمی کوردستان و عێراق کردوە، خۆیان نەکەن بە بەشێک لەو میحوەرانەی لە ناوچەکەدا هەیە، بۆیە هیچ یەک لەو میحوەرانە بۆ عێراق و هەرێمی کوردستان هیچ رێگە چارەیەکیان نییە.
ئەوەشی باسکرد: هەتا ئێستا لایەنە سیاسییەکان، هەم لەئاستی سیاسیی، لە ئاستی حکومەتی عێراقیی و حکەمەتی هەرێمی کوردستانیشدا بەرنامەیەکی رێکوپێکیان نییە، ئەوەشمان بینی لایەنە سیاسییەکانی هەرێمی کوردستان ئیدعای ئەوەیان دەکرد، هەرێم ئەبێتە نموونەیەک بۆ عێراق، بەڵام بینیمان هەرێمی کوردستان رۆژ بەڕۆژ لە رووی ئابووریی، سیاسیی، کۆمەڵایەتیی و قانوونیی و ئەمنییەوە بەرەو دواوە دەچێت، ئەتوانین بڵێین ئێستا عێراق باشتر هەنگاو دەنێت و بۆ زۆر بابەت باشتر بووە، سەرەڕای ئەوەی لە بەغداد کێشە زۆر هەیە.
کەرکوکیی ئاماژەی بە هەڵبژراردنەکانی ئەنجومەنی پارێگاکانی عێراق کرد و رایگەیاند: کۆمسیۆنی باڵای سەربەخۆی هەڵبژاردنەکانی عێراق گوشاری سیاسیی لەسەرە، زۆر لایەنی سیاسیی هەیە دەیەوێت بەشداریی هەڵبژاردن بکات، بەڵام لەرووی سیاسیی و دارایی و ئەمنیی و راگەیاندنەوە ئاستەنگیی بۆ دروست دەکرێت؛ ئەتوانین بڵێین هەڵبژاردن لە عێراقدا چارەسەر نییە، جا هەڵبژاردنی ئەنجومەنی پارێزگاکان بێت، یان هیی پەرلەمانی عێراق بێت، لە هەرێمی کوردستانیش بەهەمان شێوەیە، لە عێراقدا هەڵبژران لە کاتی خۆیدا دەکرێت و ململانێیەکی سیاسییش هەیە، بەڵام لە هەرێمی کوردستان هیچ هەڵبژرادنێك لە کاتی خۆیدا نەکراوە؛ هەروەها بایکۆت کردنی هەڵبژرادنیش چارەسەر نییە.
بەرپرسی نووسیینگەی بەغدادی تەڤگەری ئازادیی باس لە ئەڵتەرناتیڤ دەکات و وتی: هەر بۆیە ئێمە دەبێت بەدوای ئەڵتەرناتیڤدا بگەڕێین کە ئایا چارەسەر چییە؟ ئێمە نابێت هەر چاوەڕێی حیزب و لایەنی سیاسیی و حکومەت بکەین بۆ چارەسەر، ئەبێت خەڵکانی ئەکادیمیی و رۆشنبییر، رێکخراوی ژنان و گەنجان و کەسایەتییەکان پێكەوە بەشێوەیەکی لامەرکەزیی دیموکراتیی کاربکەین و عێراق ببیەن بەڕێوە.
