بە هاوبەشی ژنانی تەڤگەری ئازادیی کۆمەڵگەی کوردستان و ڕژاک، بە درووشمی “فەلسەفەی ژن، ژیان، ئازادیی” بەرەو چارەسەریی کێشەکانی ژنان و کۆمەڵگە هەنگاو دەنێین”، لە پانێلێکدا پرسی ژنان و رێگەچارەسەرییەکان خرانە بەرباس، هاوسەرۆک و ئەندامانی تەڤگەری ئازادیی ئامادەی بوون.
لە شاری سلێمانیی – هۆڵی خاک، ژنانی تەڤگەری ئازادیی کۆمەڵگەی کوردستان و ركخراوی ژنانی ئازادیی کوردستان (رژاک)، بە درووشمی “بە فەلسەفەی ژن، ژیان، ئازادیی، بەرەو چارەسەریی کێشەکانی ژنان و کۆمەڵگە هەنگاو دەنێین”، پانێڵێک بەڕێوەچوو، تارا حسێن هاوسەرۆکی تەڤگەری ئازادیی کۆمەڵگەی کوردستان، سارا رەزا ئەندامی دەستەی بەڕێوەبەریی تەڤگەری ئازادیی، هاژە محەمەد و ئەندامانی دیکەی تەڤگەری ئازادیی بەشدار بوون.
کوردە ئەحمەد – کۆمەڵناس لە پانێلی یەکەمدا بابەتێکی لەبارەی هۆکاری ئەو توندوتیژییانەی بەرامبەر ژنان دەکرێن لە کۆمەڵگەدا پێشکەش کرد، هەروەها ئاماژەی بەوە کرد ئامارەکانی ئەوە دەردەخەن ناهۆشیارییەکی مەترسییدار کۆمەڵگەی گرتووەتەوە.
![](https://tavgar.com/wp-content/uploads/2023/11/photo_2023-11-05_14-06-59-3-300x169.jpg)
پاشان لەلایەن پارێزەر چرۆ شوانیی – هاوسەرۆکی هەرێمی سلێمانی تەڤگەری ئازادیی کۆمەڵگەی کوردستان، بابەتێکی لەبارەی یاسا و گرفتەکانی دەقە یاساییەکان پێشکەشکرا و ئاماژەی بەوەکرد، هۆکاری ئەوەی ژنان ناتوانن سوود لە یاساکان وەربگرن بۆ بەدەستهێنانی مافەکانیان، ئەکەم هۆکار ئەوەیە ژنان خۆیان هۆشیارییان بەرامبەر یاساکان نییە، هۆکاری دووەمیش ئەوەیە خودی یاساکان کێشەیان هەیە و لە جێبەجێکردندا مافەکانی ژنان ناپارێزێت، چوونکە یاساکان لەلایەن عەقڵیەتێکی دەسەڵاتداری پیاوسالاراوە داڕێژراون و لە کاتی جێبەجێکردندا بە لایەنی پاراستنی مافەکانی ژناندا ناشکێتەوە.
لانیاس عەتا، ئەندامی ئەکادیمیای ژنۆلۆژیی، لە بابەتێکدا بە ناونیشانی” زانستی ژنۆلۆژی وەک چارەسەر بۆ کێشە جەوهەرییەکانی کۆمەڵگە” زانستی ژنۆلۆژیی بە ئامادەبووان ناسێنرا و ئاماژەی بەوە کرد، کە گرنگە هەموو ژنان و بەتایبەت ژنانی کورد خاوەندارێتی لەو زانستە بکەن و بیکەنە بنەمایەک بۆ ژیانیان، لەپێناو ڕزگار بوون لەو درۆ و فێڵانەی کە سیستم بۆ بە مێگەل کردنی کۆمەڵگە بڵاویان دەکاتەوە، چونکە تا ئێستا هیچ فیکر و ڕێباز و سیستم و ئایینێک بەو جۆرە کێشەکانی کۆمەڵگە و پرسی ژن دەستنیشاننەکراوە و هەر خودی ژنیش نەکراوەتەوە بە چەقی چارەسەریی بۆ پرسەکان.
![](https://tavgar.com/wp-content/uploads/2023/11/photo_2_2023-11-05_15-53-20-750x430-1-300x172.jpg)
هەروەها ڕووناک مەجید، ئەندامی دەستەی بەڕێوەبەرایەتی تەڤگەری ئازادیی کۆمەڵگەی کوردستان، لە چوارچێوەی زانستی ژنۆلۆژییدا بابەتێکی دەربارەی”هاوژیانی ئازاد” بۆ بنیاتی خێزان و کۆمەڵگەیەکی ئازاد و یەکسان و دادپەروەرانە پێشکەش کرد؛ ئاماژەی بەوە کرد، بۆ بە دەستهێنانی هاوژیانیش دەبێت ژنان خاوەن بۆ چوونی خۆیان بن و خۆیان بە موڵکی پیاو دانەنێن، هەروەها هەموو ئەو دەزگایانەی، کە لە بنەڕەتەوە بە باڵا دەستیی پیاو و کۆیلەکردنی ژن دامەزراون بگۆڕێن، بۆ پەیڕەوکردنی هاوژیانی لە سیاسەتیشدا، نوێنەرایەتی یەکسانی ژن و پیاو و سیستەمی هاوسەرۆکایەتییە.