ژمارەیەک کۆڵبەری دیکە بە تەقەی هێزەکانی ئێران بوونە قوربانی

کۆڵبەر نیوز بڵاویکردووەتەوە، ڕۆژی ١ی تشرینی یەکەم، لە ئەنجامی بۆسە و تەقەی ڕاستەوخۆی هێزەکانی سەر بە دەوڵەتی ئێران لە ناوچەی سنووری ‘تەتە’ی هەورامان لە نزیک گوندی ‘دارکی’ لە پۆلێک لە کۆڵبەران، کۆڵبەرێک کوژراوە و چەند کۆڵبەرێکی دیکەش بریندار بوون.

بە گوێرەی زانیارییەکانی ماڵپەڕەکە، هەمان ڕۆژ لە ناوچەی سنووری نودشەی سەر بە پاوە لە پارێزگای کرماشان، کۆڵبەرێک لە لایەن هێزەکانی دەوڵەت کراوەتە ئامانج و بریندار بووە. ئەوەشخراوەتەڕوو، ئەو کۆڵبەرە لە کاتێکدا تەقەی لێکراوە، کە هیچ کۆڵێکی پێنەبوو.

ئەمەش لە کاتێکدایە لە ماوەی ٢ هەفتەی ڕابردوودا، کردنە ئامانجی کۆڵبەران لە ناوچە سنوورییەکانی ڕۆژهەڵات لە لایەن هێزەکانی سەر بە دەسەڵات چڕتر بووەتەوە و لەو ماوەیەدا چەندین کۆڵبەر بە تەقەی ڕاستەوخۆی ئەو هێزانە کوژراون و بریندار بوون.