ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
نەورۆز ناوەڕۆک و هەموو ڕوخسارەکانیشی گوزارشت لە جوانی و شۆڕشگێڕی و ئازادی دەکات. نەورۆز جیاواز لەوەی سروشت خۆی دەڕازێنێتەوە و پاڵافتەترین دۆخی سوڕی سروشتە، بۆ کورد و شۆڕشەکانی بەتەواوی مانادارتر و خۆشتریشە، بەتایبەتی دوای ئەوەی پیرەمێردی شاعیر بەو هەموو ئاڵنگاری و بێ دەرفەتیەی توانی ئاگری نەورۆز بکاتەوە لەگردی مامەیارە، ڕێبەر ئاپۆ لە ڕۆژێکی وەکو ئەمڕۆدا دووبارە تێکۆشانی زیندوو هێشتنەوەی گەلی کوردستانی بە گوێی دونیادا چرپاند، وەهەر لەو ڕۆژە پیرۆزە پڕ لە واتایەدا، مەزڵوم دۆغان و هاوڕێ ژیانیەکانی تەسلیم بوونیان ڕەتکردەوە و هاتن بە دووژمنیان سەلماند، هەتا نەورۆز مابێت، گەلی کوردستان و تێکۆشانەکەی دەمێنێ و گەشەدەکات.
بە کورتی ئەگەر بۆ گەلانی تر، جەژنی نەورۆز تەنها ژیانەوەیەکی سروشتی بێت، موژدەی هاتنی بەهاربێت، بۆ گەلی کوردستان ناواخنێکی پڕتر و جوانتری هەیە، بەوەی موژدەی بەردەوامی و سەرکەوتنی بەرخۆدانەکەشیەتی..
ڕۆژگاری ئەمڕۆ تێیکەوتووین، ڕۆژگارێکە دووریمان لە پەیامەکانی نەورۆز نیشان دەدات، گەلێک خاوەنی نەورۆزبێت، هەرگیز نابێت کۆڵبدات بۆ ملهوڕەکانی سەردەمی خۆی. نەورۆز ڕاپەڕینی سەرتاسەری لەسەر شانی هەموومان دەکاتە فەرزێکی حەتمیی، ئەبێ بۆ زوحاکەکانی سەردەمیش نەورۆز ببێتە، کابووسێکی هەمیشەیی.
ئێمە، لە کاتێکدا یادی نەورۆز و سەری ساڵی کوردی ٢٧٢٢ دەکەینەوە، کە گەلە بەش مەینەتەکەمان لەسەرەی موچەی نیوە و درەنگوەختەکەیدا نەک هەر سەرە دەگرێت، بەڵکو گیانیش دەدات. ئەمە هەرگیزا و هەرگیز قبوڵکراو نیە، گەلەکەمان ئەو دۆخە وەکو قەدەری خۆی نازانێ و نابینێت، ڕۆژی تۆڵە سەندنەوە نزیکە..
نەورۆز پیرۆزبێت، لە ڕێبەر ڕێبەران ئاپۆی مەزن.
نەورۆز پیرۆزبێت، لە هەموو شەهیدانی ڕێگای نەورۆز.
نەورۆز پیرۆزبێت، لە هەموو گەلەکەمان و تەواوی مرۆڤایەتی ئازاد.
کات، کاتی ئازادییە!
کات، کاتی چنینەوەی دەستکەوتەکانی نەورۆزە..
تەڤگەری ئازادی کۆمەڵگای کوردستان
نەورۆزی ٢٧٢٢
