ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
نا بۆ پەردەپۆش کردنی شکستەکان بە گێچەڵ و ئاژاوەگێڕیی
بەهاتنی هاکان فیدان و دانیشتن لەگەڵ حکومەتی عێراق، ئەیانەوێ عێراقیش پەلکێشی شەڕ بکەن و پارتیی دیموکراتیی کوردستانیش بە ناوی پاسەوانی سنورەوە ئەم پیلاگێڕییە دژی گەریلاکانی ئازادیی جیبەجێ دەکات.
لای هەمووان ئاشکرایە لە ماوەی ٣٠ ساڵی ڕابردوو، دەسەڵاتی کوردیی لە باشوری کوردستان نەیتوانی ئیدارەی سیستمێکی دیموکرات و سەرکەوتوو بدات و دۆخ و گوزەرانی میللەتە ڕەنجدەر و ماندووەکەمان، خۆشگوزەران و سەقامگیر بکات. هەر لە سەرەتای دامەزراندنی پەرلەمانەوە تا بەڕۆژی ئەمڕۆ، لەگەڵ ئەوەی دەرفەت و زەمینی زۆر لە بار و گونجاومان هاتەپێشەوە، بەڵام هەرگیز ئەو دەرفەتانە نەکەوتنە خزمەتی دۆزی ڕەوای گەلەکەمان.
تا ئێستا گوتاری سیاسیی و کرداریی سیاسیی ئەم هەرێمە لە ناو گۆمی لێڵدا مەلەی کردووە، جارێک بە هۆکاری ساوایی حکومەتەکە و جارێک بە بیانوی داعش و جارێک بە دنەدانی سۆزی ناسیۆنالیستی کوردیی، هەوڵی داوە شکستە یەک لە دوای یەکەکانی پەردەپۆش بکات.
بەردەوام لەبری وڵاتپارێزیی؛ هێڵی خیانەت و لە بری تێکۆشان؛ تەسلیم بوون و لە بری دیموکراتییەت؛ خنکاندنی ڕای جیاواز و لە بری موچە و ژیانی هاووڵاتییان؛ دزیی و قۆرغکاریی. لە بری دروستکردنی هێزی نیشتیمانیی؛ میلیشیای حیزبیی و کەسیی و لەبری سەربەخۆیی و بەهێزبوون دوو ئیدارەیی و دابەشکردنی باشوری کوردستان بەسەر چەند زۆنی جیاوازدا، لەبری چارەسەریی؛ تەسلیم کردنی نیوە زیاتری خاکی باشور، لە بری ڕێککەوتن و چارەسەریی پرسە دەستورییەکان لەگەڵ عێراقی فیدراڵ، پشت کردنە عێراق و ڕووکردنە تورکیا، لە بری هەناردەی نەوت بە ٤٠٠ هەزار بەرمیل لە ڕێگەی سۆمۆ و وەرگرتنی بەشە بودجەی هەرێم، گرێبەستی پەنجا ساڵەی لێڵی نەوت لەگەڵ تورکیا لە ژوورە تاریکەکان و تاڵانکردنی سامانی ئەم خاکە.
هەروەها لە بری پاراستنی سەروەریی ئەو خاکەی بە خوێنی هەزاران شەهید و زیندانی سیاسیی و ئاوارەیی بەدەستهاتن، هێنانی سوپای داگیرکار بۆ داگیرکردنی زیاتری وڵاتەکەمان. حکومەتی کاربەڕێکەری شکستخواردووی هەرێم کە پارتی دیموکراتی کوردستانی عیراق بڕیاردەری دەسەڵاتدارای پلە یەکە تیایدا، گەیشتوەتە لوتکەی شکستەکانی و چیتر توانای بەڕێوەبردنی ئەم هەرێمەی نەماوە!
ئێستا و دوای سەدساڵ لە پەیمانی لۆزان و دوای ٣٢ ساڵ لە دەسەڵاتی کوردیی لە باشور و دوای کۆمەڵێک دەستکەوتی گرنگ و مەزن لە چواربەشی کوردستان، دەسەڵاتی کوردیی دەستی داگیرکارانی گرتووە و شانبەشانی ئەوان شەڕی ئازادییخوازان و شۆڕشگێڕانی کوردستان دەکات، ئەو داهات و پارەیەی کەهەشە لە بری ئەوەی ژیانێکی شایستەی بۆ فەرمانبەران و مامۆستایان و موچەخۆران پێ دابین بکات، پێشکەشی تورکیای دەکات بۆ شەڕ و داگیرکارییەکانی.
ئێمە وەک هێزێک کە لە بەرەی ناڕەزایەتییەکانی گەلین و دژ بە سیاسەتە وابەستەکانی دەسەڵاتین، هەر هەوڵێک شەرمەزار دەکەین کە بە ئاڕاستەی هێرش بۆ سەر شۆڕشگێڕان بێت و تەسلیم گرتنی کەمپنشینان بێت؛ ئەوەی لە سنورەکانی برادۆست، سیدەکان بەڕێوە دەچێت، لە ژێر هەر ناوێکدا بێت پیلانی تورکیایە و پارتی دیموکراتی کوردستانی عێراق جێبەجێ دەکات.
بۆیە ئێمە بانگەواز دەکەین بۆ پارتی دیموکراتی کوردستان، قەیرانەکانی هەرێم بە شەڕی وەکالەت و کوردکوژیی چارەسەر نابێت، هەروەها بۆ گەلەکەمان و تەواوی موچەخۆران و چین و توێژەکان پێویستە ناڕەزایەتی بەرامبەر بە شەڕی کوردکوژیی، لە خزمەتی داگیرکاران دەرببڕدرێت و بپرسن کە پارەی موچەی ئێمە نییە! ئەی بە چ پارەیەک ، لە چیا سەختەکان رێگا دروست دەکرێت بۆ خۆشکردنی ڕێگای داگیرکاریی بۆ دەوڵەتی تورکیا.
پەیامی ئێمە بۆ پارت و ڕێکخراوە سیاسیی و ڕۆشنبیرییەکان، ئەوەیە ئەگەر پێکەوە نەبین و خاوەن هەڵوێستێکی ڕادیکاڵ نەبین، بە دڵنییاییەوە پارتی دیموکراتی کوردستان هەر ڕۆژە و زیاتر لە مەترسیی لە ناوچوون و لە دەستدانی ئەم قەوارەیەش نزیکمان دەکاتەوە. پێویستە هەمووان بە یەک دەنگ بڵێین نا بۆ خزمەت کردن بە داگیرکاران.
دەستەی بەڕێوەبەرایەتی تەڤگەری ئازادیی کۆمەڵگەی کوردستان
٢٠٢٣/٩/١٧
