ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
پەرلەمانتارێکی پارتی چەپی سەوز رایگەیاند، تاکە رێگەی رزگاربوون لە قەیرانە ئابووریی، سیاسیی و کۆمەڵایەتییەکان، کۆتاییهێنانە بە سیاسەتی گۆشەگیریی و داواشی لە گەل کرد گرنگیی بەو پرسە بدەن.
مەحمود دیندار، پەرلەمانتاری پارتی چەپی سەوز لە بازنەی وان بۆ بە ئاژانسی هەواڵی فورات-ی رایگەیاند، گۆشەگیریی لە ئیمرالی گرنگترین کێشەی تورکیایە” و وتی: گۆشەگیریی بەسەر تەواوی ناوچەکەدا سەپێنراوە. هاوکات پڕۆسەی چارەسەریی بیرهێنایەوە و وتی: “ساڵی ٢٠١٣ کە پڕۆسەی چارەسەری دەستیپێکرد و بۆ ماوەی ٢ ساڵ بەردەوام بوو، وڵات سوودی ئەو پرۆسەیەی بینی”.
وتیشی: “کێشەی سەرەکی و بنچینەیی تورکیا کێشەی کوردە، دەزانین تا کێشەی کورد چارەسەر نەکرێت هیچ کێشەیەک چارەسەر نابێت، گۆشەگیری لەسەر گەل، ڕێکخراوەکانی کۆمەڵگەی مەدەنی و دامەزراوەکان جێبەجێ دەکرێت. کۆتایی هێنان بە گۆشەگیری دەرگا بەڕووی تورکیا دەکاتەوە. حکومەتی ئاکەپە- مەهەپە وڵات بە وڵات دەگەڕێت و هەوڵدەدات خۆی لە قەیرانی ئابووری ڕزگار بکات. بەڵام هۆکاری هەموو ئەمانە سەپاندنی گۆشەگیرە بەسەر بەڕێز عەبدوڵا ئۆجالان دا، ماوەی ٣٠ مانگە ڕێگە نادرێت چاوی بە بنەماڵە و پارێزەرەکانی بکەوێت. ئۆجالان پێشتر وتبووی، “دەتوانم ئەو کێشەیە لە ماوەی هەفتەیەکدا چارەسەر بکەم”.
ئەو پارلەمانتارەی پارتی چەپی سەوز دووپاتیکردەوە، کاراکتەری سەرەکی کۆتاییهێنان به شەڕ و قۆناغی قەیرانەکە عەبدوڵا ئۆجالانه و وتی: به دڵنیاییەوه دەبێت سوود له ئەندێشە و وتنەکانی عەبدوڵا ئۆجالان وەڕبگیرێت. نە تەنیا پارتی چەپی سەوز، بەڵکو پێویستە هەموو پارت و لایەنەکانی دیکەش گرنگی بە پرسی گۆشەگیری بدەن، هۆکاری قەیرانە ئابووری، سیاسی و کۆمەڵایەتییەکانمان چارەسەرنەکردنی کێشەی کوردە.
دیندار هەروەها سەرنجی بۆ ڕۆڵی ڕێبەری گەلی کورد ڕاکێشا و وتی: لە هەمووان زیاتر حکومەت بە ڕۆڵ و کاریگەری عەبدوڵا ئۆجەلان دەزانێت. هیچ واتایەکی نییە دەرگا بە دەرگا بگەڕێت و هەوڵ بدات پارە لە وڵاتان بهێنێت. کێشەی ئابووری بەم شێوەیە چارەسەر ناکرێت، نە تەنیا ئابووری، هیچ کێشەیەک لەو شێوەیە چارەسەر نابێت.
مەحمود دیندار لە کۆتایشدا وتی: ئەم وڵاتە پێویستی بە ئارامی و سەقامگیری هەیە، هەر بۆیە ئێمە گۆشەگیری لەسەر عەبدوڵا ئۆجالان تێکدەشکێنین، لە بەرنامەی پارتەکەماندا لەوبارەیەوە گفتوگۆ و هەڵسەنگاندن دەکەین، بۆ ئەوەی وڵات لە کێشەکان ڕزگاری بێت، دەبێت پێش هەموو شتێک کۆتایی بە گۆشەگیری بهێنرێت. لەگەڵ گەلەکەمان لە هەموو گۆڕەپانەکان باسی ئەوە دەکەین.
