بۆ خەڵكی كەركوك، بەتەواوی پێكهاتە و لایەنە سیاسیی و كەسایەتیی و رێكخراوەكانی كۆمەڵگەی مەدەنیی و داموودەزگا ئەمنییەكان.
ئەوەی لە كەركوك ڕوو دەدات، ئەگەر زوو پێشی لێ نەگیرێت و بە ئاشتییانە چارەسەر نەكرێت، دەبێتە فیتنە و شەڕوو ئاژاوە و پێكدانانی تائیفیی و نەتەوەیی بەدوای خویدا دەهێنێت و شارەكە بەر بەوێرانە و ماڵوێرانیی دەبات و چارەسەر كردنی مەحاڵ دەبێت.
ئێمە وەك تەڤگەری ئازادیی، پێمان وایە بەشێوەی تاكڕەویی و عسكەرتارییەت و بەسەربازگەکردن، نە لە ڕابردوو نە لە ئێستا و داهاتوشدا، ناتوانرێت كەركوك بەڕێوەببرێت. پێمانوایە گونجاوتریین شێوازی بەڕێوەبردن بۆ كەركوك و كەركوكییەكان ئەوەیە خۆیان بڕیار لەسەر بەڕێوەبردنی خۆیان بدەن. ئەگەر زوو پێش لەم گرژیی و ئاڵۆزییانە نەگیرێت، ئەوە ڕێگە لەبەردەم دەستتێوەردانی دەرەكیی دەكاتەوە! ئەوەی ڕوو دەدات لەپشت ئەم خوپێشاندانەوە، بەشێكی مەرامی سیاسیی و حملەی ئینتیخابیی پێشوەختەیە؛ بۆ بەدی هاتنی ئەو مەرامە گڵاوەش خەڵكی كەركوك و ئاشتیی و تەبایی نێو نەتەوەكان دەبێتە قوربانیی، بۆیە داواكاریین لە سەرجەم پێكهاتەكانی شاری كەركوك، بە وریاییەوە مامەڵە لەگەڵ دۆخەكە بكەن و ئاشتیی و پێكەوەژیان بكەنە بنەمای چارەسەركردنی كێشەكانیان تەوەكو بتوانن ئەو مەرام و پیلانانەی هەیە پێكەوە پوچەڵی بكەنەوە.
لە كۆتاییدا جارێكی تر، داوە لە سەرجەم خەڵكی كەركوك دەكەین، پێكەوە كێشەكان چارەسەر بكەن و بەر لە فیتنەی تائیفی بگرن.
تەڤگەری ئازادیی كۆمەڵگەی كوردستان – ئەنجومەنی هەرێمی كەركوك
٢٠٢٣/٩/٢