ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
تەڤگەری ئازادیی به دروشمی “به به‌رزكردنه‌وه‌ی تێكۆشان په‌یمانی سه‌ده تێكده‌شكێنین، كوردستان ده‌پارێزین” لە گردی مامە یارەی شاری سلێمانییەوە داوا لە گەلی باشوری کوردستان دەکەن بەشداری لە نەورۆزی قەندیل_دا بکەن.
دوای نیوڕۆی ئەمڕۆ سێ شەممە ٢٠٢٣/٣/١٤ لە گردی مامەیارەی شاری سلێمانی، تەڤگەری ئازادی کۆمەڵگای کوردستان، بە ئامادەبوونی تارا حسێن، هاوسەرۆکی گشتی تەڤگەری ئازادیی کۆمەڵگەی کوردستان و بەشێک لە ئەندامانی دەستەی بەڕێوەبەرایەتی تەڤگەر، کۆنگرەیەکی ڕۆژنامەنووسیان سازدا، بە مەبەستی بانگهێشتکردنی گەلی باشووری کوردستان، بۆ ئاهەنگی جەژنی نەورۆز لە بناری قەندیل، لە بانگهێشتنامەکەدا هاتبوو: وه‌رن هه‌موومان پێكه‌وه نه‌ورۆزی ئازادیی و سه‌ری ساڵی نوێی كوردی له قه‌ندیلی سەرکەش پیرۆز بكه‌ین.
چرۆ شوانی بەیاننامەکەی تەڤگەری ئازادیی خوێندەوە و تیایدا هاتبوو: گه‌لی ئازادییخواز و خۆراگری كوردستان حاشاهەڵنەگرە ئاگری نه‌ورۆز له دیرۆکی كوردان و گه‌لانی ناوچه‌كه‌دا لە مەغزایەکی قوڵەوە، وه‌ك هێمای سه‌ركه‌وتن له به‌رامبه‌ر زوحاكه سته‌مكاره‌كان هه‌ڵكراوه و ئه‌و ڕۆژه بووه‌ته وه‌رچه‌خانێكی مه‌زن له ژیانی گەلانی ناوچه‌كه‌دا، له ڕۆژگاری ئه‌مڕۆشماندا مه‌شخه‌ڵی ئه‌و ئاگره له ده‌ستی به‌هێزی كوڕان و كچانی شۆڕشگێر و نه‌وه‌كانی كاوه‌ی سه‌رده‌م و خوێندکارەکانی ڕێبه‌ر ئاپۆ بڵێسه‌دارتره و له لووتكه‌ی چیا به‌رزه‌كانی كوردستان ده‌گه‌شێته‌وه.
شوانی، ئاماژەی بەوەشکرد، وەکو ئاکتۆرێکی کاریگەر له ئێستادا شۆڕشی (ژن – ژیان – ئازادیی) له ناوچه‌كه‌دا سیسته‌مه ئۆلیگارشی و تۆتالیتاره‌كانی هێناوه‌ته سه‌ر ئه‌ژنۆ، گەلی وڵاتپارێز له كاتێكدا ئێمه بانگی پیرۆز كردنی نه‌ورۆز ده‌ده‌ین، گه‌له‌كه‌مان له باكور و ڕۆژئاوای وڵاتدا تووشی گه‌وره‌ترین كاره‌ساتی سرۆشتی بۆته‌وه كه زیاتر له سه‌د هه‌زار قوربانی لێكه‌وته‌وه، به‌ڵام ده‌بێت ئه‌وه بزانین كه نه‌ورۆز ته‌نها بۆنه‌یه‌كی كلتووری و شادی نییه، به‌ڵكو نه‌ورۆزی 2723ی كوردی له قه‌ندیلی سه‌ربڵند له ناوه‌ندی ڕه‌مزی خۆڕاگری ده‌كه‌ین به وه‌ڵام گۆیه‌كی سیاسی دژی فاشیزمی (ئاكه‌په و مه‌هه‌په).
ئەوەشی خستەڕوو: بۆ ته‌واوی گه‌لانی وڵات پارێز و سه‌رجه‌م لایه‌نه سیاسییه‌كان و چین و توێژه‌كانی كۆمه‌ڵگا و پێكهاته‌و ئایین و ئایینزاكانی جڤاكی ڕه‌نگینی كوردستان، وه‌رن پێكه‌وه جه‌ژنی نه‌ورۆز هێمای ئاشتی و برایەتی و سەرکەوتنی گه‌لان له قه‌ندیلی قه‌ڵای خۆڕاگری و ئازادی پیرۆز بكه‌ین.
وتیشی، نه‌ورۆز جه‌ژنی ژیانه‌وه و نوێبوونه‌وه‌ی سروشت و ئاوێزان بوونی سه‌ركه‌وتنی حه‌قه به‌سه‌ر ناحەقدا، وەرن بائەم نەورۆزە بکەین بەدیاری بۆ ئەو ماتەمینە مەزنەی گەلەکەمانی پێدا دەگوزەرێت، وەک وەفایەک بۆ تێپەڕاندنی ئەو دۆخە تراژیدیە ڕیشەدارو مێژووییە له ژێر ڕۆشنایی ئه‌و تیشكه ڕوناكانه‌ی له ئیمڕاڵیه‌وه دێن و به گه‌رمای ڕۆحی نه‌ورۆز په‌یمانی لۆزان هه‌ڵبوه‌شێنینه‌وەو به فه‌لسه‌فه‌ی (ژن – ژیان – ئازادیی )هەنگاوەکانی جێگیر کردنی کۆنفدرالیزمی دیموکراتی بەهێزتر بکەین.
