ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
٣٤ بەر لە ئێستا ڕژێمى بەعس یەکەمین قۆناغی پرۆسەی ئەنفالی لە دۆڵی جافایەتییەوە دەستپێکرد، تیایدا ژمارەیەکى زۆر لە هاوڵاتى مەدەنى شەهیدبوون و بەشێک لە دانیشتوانى ئەو سنورە ڕاگوازران و هەزاران هاوڵاتیش ئاوارەبوون .
لە قۆناغى یەکەمى پرۆسەى ئەنفالدا، کە ٢٢ی شوباتی ١٩٨٨ دەستیپێکرد، ڕژێمى بەعسی عێراق هێرشیکردە سەر گوندەکانى سەرگەڵو وبەرگەڵو لە دۆڵی جافایەتی، لە چەند قۆڵێکەوە و بە درێژایی ٨٠ کیلۆمەتر لە بنگردەوە بۆ لای ڕۆژھەڵاتی دەریاچەی دوکان و شارۆچکەی دوکان، لەوێشەوە بۆ شاری سلێمانی و شارۆچکەی ماوەت و چوارتای گرتەوە.
ئامانجى ڕژێمى بەعس لەو پڕۆسە لە قۆناغى یەکەمدا وێرانکردنی ٢٥ تا ٣٠ گوندبوو لە دۆڵی جافایەتی و ھێرشەکەش سنووری شارۆچکەکانی (سورداش، دوکان، سەرچنار، قەڵاچوالان، چوارتا)ی گرتەوە، کە ڕاستەوخۆ سوڵتان ھاشم وەزیری بەرگریی ئەوکاتى عێراق سەرپەرشتیى دەکرد.
ھێزە بەشداربووەکانی ئەو شاڵاوە پێکھاتبوون لە ٢٠ لیوا و ٦٠ فەوج، کە بەهۆیانەوە وێرانکارییەکی تەواو لەو ناوچانە ڕوویدا و تێیدا گوندەکانی قەمچۆغە، شاخەڕەش، دۆڵەڕووت، قزلەر، قەرەسەرد، ئاسۆس، قەرەچەتان، شەدەڵە، پیرەمەگرون، زێوێ، گەڕەدێ، دابان، مەرگەوشارستێن) و چەندین گوندی دیکە سوتێنران و تەختی زەوی کران و مەڕ و ماڵات و ماڵ و موڵکی دانیشتوانى گوندەکان تاڵانکران.
لەم قۆناغەى پڕۆسەى ئەنفالدا بۆسەر دۆڵى جافایەتى و دەوروبەرى چەندین ھاوڵاتی شەھیدبون و چەندانی دیکەش بەر شاڵاوی ئەنفال کەوتن و ڕاگوازران و ژمارەیەکى زۆرى هاوڵاتیانیش ئاوارەبوون سەدان کەسیش بەرەو ئێران و هەندێکیش بەرەو سلێمانی هەڵهاتن.
