ته‌ڤگه‌ر کۆمه‌ڵگه‌یه‌کی ئازاد و دیموکرات و ژینگه پاریز
بابەتی پەیوەندیدار
بەرز و پیرۆز بێت یەکی ئایار ڕۆژی جیهانی چینی کرێکار، ئەو ڕۆژە لە تەواوی کرێکاران لە جیهان و گەلەکەمان پیرۆز دەکەین.
یەکی ئایار کە بە ڕۆژی جیهانی چینی کرێکار ناسراوە لەئاستی جیهانیدا ١٣٢ ساڵە کرێکاران و چینە ڕەنجدەرەکانی کۆمەڵگە بە شێوازی جیاجیا یادی دەکەنەوە، بەو هۆیەوە ڕۆژی یەکی ئایار بووەتە هێمای تێکۆشان بۆ کرێکاران و ستەملێکراوان لەدژی دەسەڵاتە ملهوڕ و سەرمایەدارەکان، ئەو ڕۆژە وەک دەستکەوتێک بە خەبات و ڕەنجی کرێکاران دروست بووە و بووەتە هەوێنی یەکیەتی و هاوخەباتی نێو نەتەوەیی چینی کرێکار و ڕەنجدەرانی گەلانی ئازادیخواز و هێزە شۆڕشگێڕەکان کە لە ئەمڕۆدا لەبەرامبەر دەسەڵاتە ستەمکارە جیهانی و لۆکاڵی و وابەستەکانی سیستەمی تێکدەر و قڕکەری سەرمایەداری لەنێو تێکۆشانێکی مێژوویدان. لەو نێوەدا بزووتنەوەی ئازادیخوازی گەلی کورد کە بە ڕەنج و خوێنی چینی کرێکاران و ڕەنجدەرانی کۆمەڵگە و ئازادیخوازە شۆڕشگێڕەکانی سەرپێ کەوتووە دەیان ساڵە لەدژی فاشیزم و داگیرکاری و بە کرێگیراوی دەوڵەت نەتەوەکانی هەرێمی و جیهانی بۆ ئازادی گەلی کورد و و شکۆمەندی مرۆڤایەتی بەرخۆدانێکی مەزن و شکۆدار بەڕێوە دەبات و بووەتە تاکە هیوای سەرجەم چینە چەوساوەکان و گەلانی بن دەست، ئەو تێکۆشانە لەسەر بنەمای زیهنیەتی نەتەوەی دیموکراتیک و سیستەمی کۆنفیدراڵیزمی دیموکراتی خۆی بە ڕێکخستن کردووە بۆ چارەسەری کێشە کۆمەڵایەتی و نەتەوەیی و ئیتنیکییەکان لە دەرەوەی زیهنیەتی دەوڵەت نەتەوەدا لە چوارچێوەی خۆبەڕێوەبەری کۆمەڵگەکاندا گوزارشت لە ئیرادە و بوونی خۆیان دەکەن لەڕووی ئابووری و ژیانییەوە پشت بە ئابووری هەرەوەزی کۆمیناڵ و ژینگە پارێزیی دەبەستێت، ئەوەش وەر چەرخانێکی زیهنی و کۆمەڵایەتی بۆ تەواوی چین و توێژەکان دەهێنێتە ئاراوە کە دوورە لە قازانج و کەڵەکە کردنی سەرمایە و دروستکردنی چینی چەوسێنەر و چەوساوە بۆیە ئەو بزووتنەوە ئازادیی بەخشە لە هەر چوار لای دونیاوە هێرشی دە کرێتە سەر ئەوەش تەنیا لەبەر ڕاستکردنەوە و پێشەنگایەتی تێکۆشانی ئازادیی گەلانە، مێژووی سیستەمی دەسەڵاتداری کە لەسەر بنەمای کۆیلەکردنی چینەکانی خوارەوەی کۆمەڵگە بنیات نراوە قۆناخ لە دوای قۆناخ سیاسەتی دڕندانە و پاوانخوازییان توندتر کردووە تا گەیشتووە بە قۆناخی مۆدێرنیتەی سەرمایەداریی کە هەموو نرخە کۆمەڵایەتی و گەردوونی و کولتوورەکانیان کردووە بە کاڵا لەپێناو بە دەستخستنی سەرمایە و قازانجدا و هەموو پرۆسەیەکی کار و ژیانیان لاسەنگ کردووە، ژینگەیان تێک داوە، نەخۆشی و قەیرانەکانیان بە جۆرێک زیاد کردووە سەر زەمینیان بۆ مرۆڤایەتی کردووە بە دۆزەخ، لە کاتێکدا گرنگترین ماف و نرخ بۆ مرۆڤ هاوسەنگی نێوان ئەرک و مافە بەڵام دەسەڵات ئەم هاوکێشەیەی پێچەوانە کردووەتەوە لەبەرامبەردا هەوڵ و تێکۆشانی چینە چەوساوەکانی کۆمەڵگە بۆ ئەوە بووە کە هاوسەنگییەک لە نێوان ئەرکی خۆیان و مافەکانیان بنیات بنێن و بگەڕێنەوە بۆ سیستەمی کۆمەڵگەی سروشتی کە لەو قۆناخەدا ژیانی سەر دەستی و بن دەستی و هەڵاواردنی ڕەگەزی نایەکسانی نەبووە.
مێژوویەکی دوور و درێژە گەلانی کوردستان دووچاری داگیرکاری و سیاسەتی ڕەگەزپەرستی و جینۆساید بووەتەوە داگیرکەرانی کوردستان توندترین و شۆڤێنیترین سیاسەتیان لە سەر گەلی کورد پەیڕەو کردووە ئەوەتا دەوڵەتێکی وەکو تورکیا کە لە بنەڕەتەوە لەسەر بنەمای نەتەوەگەرای تورک دروست بووە و بەردەوام سیاسەتی نکۆڵی کردن لە بوونی نەتەوەی کورد و جوگرافیا و خاک و مێژوو کولتوورەکەی پەیڕەوکردووە و بوونی گەلی کورد قبووڵ ناکات و بە ئاگر و ئاسن وەڵامی مافە ڕەوا و گەردوونییەکانی دەداتەوە جیهانی مۆدێرنیتەی چەوسێنەریش کە درووشمی مافی مرۆڤ و دیموکراتی لێ دەدەن! لەبەرامبەر ئەو سیاسەتە دڕندانەیە بێدەنگن و هیچ هەڵوێستێکیان نییە ئەوەش سەرچاوەکەی ئەو زیهنیەتە دژ بە ئازادی و ژیان و ژینگەیە کە هەموو شتێک دەخاتە خزمەت خۆیەوە. لە چەند دەیەی ڕابردوودا بزووتنەوەی ئازادیخواز لە باشووری کوردستان بەهۆی گۆڕانکارییە جیهانی و ناکۆکی هێزە هەرێمییەکان و دەستتێوەردانی ئەمریکا و هاوپەیمانەکانی لەدوای شەڕی کەنداو ڕووخانی دەوڵەت نەتەوەی ڕژێمی بەعس باشووری کوردستان دەرفەتێکی مێژوویی بۆ هاتە پێشەوە کە دەتوانرا بخرێتە خزمەت چارەسەری کێشە گەلی کورد بەڵام بەهۆی لاوازی ڕێبەرایەتی و نەبوونی پێشەنگایەتیەکی شۆڕشگێڕ و ئازادیخواز کە هەڵقوڵاوی ناو چینی چەوساوە و ڕەنجدەران بێت ئەو دەرفەت و شۆڕش و قوربانیدانە مەزنەش کە گەلەکەمان پێشکەشی کردبوو بە هەدەر و هەرزان لەبار براو خستیانە خزمەت بەرژەوەندییە حیزبی و بنەماڵەییە کانیانەوە. لە ڕۆژگاری ئەمڕۆشدا لەسایەی ئەو دەسەڵاتە خۆسەپێنە گەندەڵ و وا بەستە بە داگیرکەردان گوزەرانی خەڵکی هەژار و زەحمەتکێش و کرێکاران و فەرمانبەرانی بەرەو قەیران و بێ دەرامەتی و سەختی زیاتر دەچێت، شڵەژانی کۆمەڵایەتی بێکاری و هەژاری و کۆچبەری لە هەڵکشانێکی مەترسیدار دایە ناسەقامگیری سیاسی و ئابووری کێشە و قەیرانی کەڵەکەبوو تاک و کۆمەڵگەی باشووری کوردستانی گەیاندووە بە قەدەری نادیار و بێ هیوایەکی کوشندە، ئەوە لە کاتێکدایە باشووری کوردستان کە خاوەنی زۆرترین کەرەستەی خام و زەوی کشتوکاڵی و شوێنی گەشتیاری و بازرگانی و وەبەرهێنانە و ژمارەیەکی کەمی دانیشتووانی هەیە، بەڵام لە سەخترین ڕەوشی ئابووریدا ژیان دەکات سەرەڕای فرۆشتنی بڕێکی زۆری نەوت و غاز و داهاتی ناوخۆیی بەڵام حکومەتی هەرێم تەنانەت مووچەی فەرمانبەران دابین ناکات و خزمەتگوزارییەکان پەک دەخات و لەشکرێکی لە بێکاری دروست کردووە، کە ئامانج لێی هەم کۆیلەکردن و هەم بە دەستخستنی هێزی کارە بە هەرزان، ئەمەش دەرفەتی زیاتری بۆ دەستتێوەردانی داگیرکەران و دەوڵەتان ڕەخساندووە و قەیرانەکانی ناوخۆی قووڵتر کردووەتەوە، گەلی باشوور بە کرێکار و فەرمانبەرانەوە بە کاسبکار و ژنان و گەنجان و هەژاران و بێ کارانەوە بەردەوام لە نێو لێ گەڕین و ناڕەزایەتی بەردەوامدان لەدژی ئەو نا دادی و گەندەڵییەی دەسەڵاتدارن، بۆیە دەبێت بەئەزموون وەرگرتن لە ڕابردوو ناڕەزایەتییەکان یەک بخرێن و ڕێک بخرێن بۆ فشار خستنەسەر دەسەڵاتداران و ناچارکردنیان بۆ جێ بەجێکردنی ماف و داخوازییەکانیان، ڕێگای هەرە ڕاست بۆ سەرکەوتن گەڕانەوەیە بۆ ئیرادەی گەل و بە ڕێکخستن بوونیەتی لەناو سیستەمێکی سیاسی کۆمەڵایەتی کە هەموو چین و توێژەکان تێیدا خاوەن ماف و بڕیارین.
بۆ ئەوەش تەڤگەری ئازادیی کۆمەڵگەی کوردستان وەک سیستەمێکی سیاسی ئابووری کۆمەڵایەتی خاوەن پرۆژەی چارەسەرە و کراوەیە بۆ تێکۆشانی سەرجەم چین و توێژەکانی کۆمەڵگە بە پارادایمی نوێ لە دەرەوەی زیهنیەتی دەسەڵاتداری و پاوانخوازی دەوڵەت نەتەوەدا، بۆ ئەوە بانگ لە کرێکاران و سەرجەم چین و توێژە ڕەنجدەرەکان دەکات بێنە مەیدانەکان و پێشەنگایەتی ئەو تێکۆشانە بکەن و لە ئەنجوومەن و کۆمینی سەربەخۆی خۆیاندا خۆ بە ڕێکخستن بکەن بۆ پێکهێنانی سیستەمی کۆمەڵگەیەکی ئاسۆیی وەک بەدیلی کۆمەڵگەی پلەداریی، هەر ئەوەش بەهێزترین چەکی سەرکەوتنە بەسەر سیستەمی سەرمایە پەرست و دەسەڵاتە بەرژەوەندیخواز و پلەدارەکان.
سەرکەوتن لە ڕێکخستن بوونماندایە
بژی خەباتی گەلانی بن دەست و ئازادیخواز
تەڤگەری ئازادیی کۆمەڵگەی کوردستان
دەستەی بەڕێوەبەرایەتی
١ی ئایار ٢٠٢٢
