لە ناوچەی کوڕەژارۆی زاپ لە نێوان گەریلاکانی هەپەگە و ئەرتەشی تورکی داگیرکەر شەڕێکی قورس بەرێوە دەچێت. هاوکات پەدەکەش هێزێکی گەورەی رەوانەی کۆرەژارۆ و شێڵادزێ و دێرەلووک کردووە، کە دەکەونە دامێنی چیای کۆرەژارۆ.
بەگوێرەی ئەو زانیاریانەی لەسەرچاوە ناوچەیەکانەوە بەدەستگەیشتوون، پەدەکە هێزێکی گەورەی بەرەو شارۆچکەی شیلادزێ و دێرەلووک ناردووە، ئەوەش لەکاتێکدایە کە لە بەرزاییەکانی ئەو ناوچەیەدا و لە چیای کۆرەژارۆ لە نێوان گەریلاکانی هەپەگە و ئەرتەشی تورک شەڕێکی قورس بەرێوە دەچێت.
ڤیدیۆی ئەو جموجوڵ و گواستنەوەی هێزی پەدەکە بەرەو کوڕەژارۆ و ناوچەکانی شیلادزێ و دێرەلوک تۆمار کرا.
هەمان سەرچاوە راشیگەیاند، پەدەکە بەردەوامە لە ناردنی هێزی سەربازی بۆ ناوچەکانی گەریلا.