راپەڕین ، لە شکۆوە بۆ نەفرەتکردن

ئیدریس سدیق

 شارەزایانی مێژوو ، ئاماژە بە وتەیەکی واتاداری پڕاکتیکی و لۆجیستی دەکەن لەمەڕ ئەگەری سەرهەڵدان و هاتنه پێشەوەی هەر رووداوێکی لەناکاو و پێشهاتەیەك ، کە دەڵێ : ( هەل کچی هەورە تریشقەیە ، بە چاو ترووکانێك دێت و دەڕوا ) . سەرکردە سەربازییە شارەزاکانیش ئاماژە بە سەخت و دژوار و قوربانیدانی سەرکەوتنەکان دەکەن ، وەلێ دەستگرتن بە لوتکە ، سەختتر و قوڕسترە لە پارێزگاریکردنی ، شارەزایی بەڕێوەبردن ، زیرەکی و وشیاری ، چاوکراوەیی لە خوێندنەوە و هەڵسەنگاندن ، تەتەڵە کردنی پێشهاتەکان ، هەڵوەستەکردن و بڕیاردانی ژیرانە ، وەك ئەوەی لینین دەڵێت : ( هەشت جار قوماشەکە بپێوە ، ئینجا بیبڕە ) . گابڕێل گارسیا مارکیزی گەورە بیرمەند و رۆماننووسی کۆڵۆمبیش لەو سەر و بەندەدا ئاماژە بە ( هەمووان دەیانەوێت لەسەر لوتکەی چیادا بژین ، نازانن کە کامەڕانی لە پیاهەڵزنانیدایە ) دەکات ، ئەم وتەیەش واتا فراونبوونێکی بەخشە لە تام و چێژ بەخشی لە ژیاندا کە گیانی ئالنگاری زۆری تێدایە لە ورە بەرزی ، نەچەمانەوە ، دانبەخۆداگرتن ، هیوابوون بە دوارۆژ ، متمانە بەخۆبوون ، رووبەڕووبوونەوە ، وڵاتپارێزی و …… . ژیانیش جوولەیەکی هەمیشەیی و بەردەوامە لە پێناو وەدیهێنانی ئاوات و خواستە دروستەکان . لە هەڵومەرجی نێو دەوڵەتی و هەرێمایەتی و سەرکێشی سەدام حوسێن ، لە شەڕی عێراق و ئێران ، داگیرکردنی کوێت ، شەڕی کەنداو و خاپوورکردنی ژێرخانی ئابووری عێراق و لاوازکردنی سوپاکەی کە رێکەوتننامەی سەفوانی ٣ / ٣ / ١٩٩١ ی بەدواداهات ، ئەنجامەکەی واڵابوون و فراوانبوونی هەژموونی ستراتیجی ئەمریکا و هاو پەیمانانی لە رۆژهەڵاتی ناوین و دەستبەسەراگرتن و تاڵانکردن و دزینی خێر و بێری ئەو وڵاتانە و رێگریگرتن لە توندڕۆیی ، پیادەکردنی پڕۆسەی ئازادی ، دیموکراتی و مافی مرۆڤ کە ( درۆیەکی گەورە و خۆڵ لە چاوکردنە ) ، یەکێتی ئەوڕوپاش لایەنگری بەها مرۆیی و داد پەروەرییە ! لە لایەکی تریشەوە دەرگای ناڕەزایەتی ، سەرهەڵدان و راپەڕینی گەلانی عێراقی کردە سەرپشت و زەمینە سازی بۆ ناڕەزایی دەربڕین دژی ستەم و زۆرداری دەسەڵات خۆشکرد ، لە ١٦ ی / فێبیروەری / ١٩٩١ ، جۆرج بۆشی سەرۆکی ئەمریکاش ، داوای لە گەلانی عێراق دەکا راپەڕن و کاروباری عێراق بگرنە دەست و خۆیان لە سەدام رزگار بکەن ! بەسڕە ئاگری راپەڕینی جۆشدا ، چواردە پارێزگای بە شیعە نشین و باشووری کوردستانیشی گرتەوە ، بەرپرسە باڵاکانی ئیتیڵاعاتی ئاخوندەکانیش ، بەرپرسە کوردە شۆڕشگێڕەکانی شاخیان فوو تێکرد و هانیاندان بۆ پشتگیری برا شیعەکان ، باشووری کوردستانیش چەخماخەی راپەڕینی لێدا لە پێنجی ئاداری ١٩٩١ ، لە دەروازەی رانیە تا بیست و یەکی ئادار بە رزگارکردنی کەرکوکی دڵ و قودسەکە کۆتاییهات ، هەواڵگری CIA ، دەستی رژێمی واڵا کرد و گلۆپی سەوزی بۆ هەڵکرد بۆ کوشتوبڕی ، شەقامی شارە شیعەنشینەکانی نوقمی خوێنکرد و کوردیشی تووشی کۆچڕەوە مەزنەکە کرد ، هەستو سۆزی نێو دەوڵەتی و بڕیاری ئەنجومەنی ئاسایشی نەتەوە یەکگرتووەکانی ژمارە ٦٨٨ ی لە ٥ / ٤ / ١٩٩١ ی بەدوایخۆیدا هێنا ، خۆسەرێتی کوردی هێنایە گۆڕەپان بەناوی زلی هەرێمی کوردستان ! پتر لە سێ چارەکە سەدەی پڕاوپڕ لە ئێش و ئازار ، شکست دوای شکستی ئەو نوخبەیەی بەناو رێبەرانی بزاڤی رزگاری ، کە بە ئەجیندا و پلان و بەرژەوەندییەکان و هەژمونی هەواڵگری نەیارەکان ئاڕاستە و رێنمایی دەکران هاتنە سەر حازرەکی ، وەك دێوەزمەیەکی رەزا گران ، بوون بەبارێکی قوڕس بەسەر شانی گەلێکی بەرخۆدەری ئازا و چەڵەنگ و چاونەترسی هەڵقوڵاوی نێو ئێش و ئازار و ستەمی داگیرکەران ، دەشێ پرسیار بکرێ ، دەستکەوتەکان چین ؟ ئەوەی دەگوزەرێ دوورە لە پرسی خاك و نەتەوە ، کۆکردنەوەی هەموو دەسەڵاتەکانە لەناو بەناو حیزب و ئۆرگانەکانی ، لەناو حیزبیش تاکە کەسێك بڕیار دەرە لەسەر هەموو پرسەکان وەك بتیش دەپێ بپەرسترێ ، ئەوەی بەدیش دەکرێ لەو دەسەڵاتە خۆماڵییە ، تەنها پاڕادۆکسێکە لە بێئیڕادەیی ، چەمانەوە بۆ داگیرکەران ، ورە بەردان ، چەقبەستوویی ، پێرۆزی بنەماڵە ، نووچدان و دۆشدامانە و …… ، بەدەر لە بەدیهێنانی خواستە دروستەکان لە ئاسایشی نیشتیمانی ، بنیاتنانی ژێرخانی ئابووری ، پێکەوە ژیان ، مرۆڤدۆستی ، دادپەروەری ، جوانی و شکۆی تاك ، رێباز و هزرێك لە خوێندنەوەیەکی توکمە لە سیاسەتی ناوخۆ و پێوەندییە هەرێمی و نێو دەوڵەتییەکان . راپەڕین وەچەرخانێکی مێژوویی بوو لە کۆمەڵگای کوردی بە گشتی و لەباشوور بەتایبەتی ، لە هەلومەرجێکی هەرێمی و نێودەوڵەتی هاتە پێشەوە ، بەناو نوخبەی کوردی لە ئاست ئەو پێشهاتەیە نەبوون چ لە رووی سیاسی چ لەرووی ئیدارەدان و بەرەو پێشەوە بردنی پرسی کورد و بەهێز کردنی پێگەکەی ، لە ناوەوە وەك پرسی هەر چوار پارچە ، لە دەرەوەش وەك ستراتیج ، بەڵکو خوڵانەوەیەك لە ناو بازنەیەکی بەتاڵ بوو ، رۆمانێکی ناخهەژێنی پڕ سفتوسۆی تاڵ ، لە شکست بەرەو شکستێکی تر ، لە هەڵدێرێکەوە بۆ هەڵدێرێکی تر ، دۆڕاو لە پرسی نیشتیمانی ، سەودایەك بۆ هەڕاجکردنی خاك ، تکانی شکۆ و ناسنامەی وڵاتپارێزی ، لە ئەنفالی جەستە بۆ ئەنفالی رۆح ، لە هەزار و یەك نەفرەتەی تاك لە تامەزرۆیی رزگاری بۆ بێئیڕادەیی و بێئومێدی و ……. . کەواتە نیشتیمان ، نیشتمانی حیزبە ، تاکیش کاتێ دەبێ بە سواڵکەر ، خۆزگە بەو رۆژانەی بەر لە راپەڕین بخوازێ ، پەنجەی پەشیمانی بگەزێ ، باوەڕی بە خاك و نیشتیمان و ئینتیمای نامینێ . کورد پێویستی بە شۆڕشی چەکداری نییە ، پێویستی بە شۆڕشێکی فکری ، رۆشنبیری ، سیاسی ، ئابووری ، کۆمەڵایەتی هەبوو نەك راپەڕین .

هەروەها چێکی بکە

ڕۆژهەڵاتی کوردســــتان، لەبەردەم گۆڕانکارییەکی گەورە دا

         مژدە علی بەشــــی دووەم: ڕۆڵی ووڵاتانی هەرێمی و ڕۆژئـــاوایی و دەستێوەردانەکانیان …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *